جام کمال کی ملائیشین وزیر سے ملاقات: ڈیجیٹل تبدیلی اور تجارت میں تعاون پر اتفاق

کوالالمپور: وفاقی وزیرِ تجارت جام کمال خان نے ملائیشین وزیرِ ڈیجیٹل گووبند سنگھ دیو سے پاکستان-ملائیشیا بزنس اینڈ انویسٹمنٹ کانفرنس کے موقع پر ملاقات کی۔ ملاقات میں دونوں وزراء نے ڈیجیٹل تبدیلی، تجارت اور سرمایہ کاری کے شعبوں میں تعاون بڑھانے پر اتفاق کیا۔

دونوں رہنماؤں نے مصنوعی ذہانت (اے آئی) اور فائیو جی انفراسٹرکچر کے شعبوں میں مشترکہ منصوبوں پر تبادلہ خیال کیا۔ اس کے علاوہ، وزیراعظم شہباز شریف اور ملائیشین وزیراعظم انور ابراہیم کی حالیہ ملاقات کو دونوں وزراء نے کامیاب قرار دیا۔

جام کمال خان اور گووبند سنگھ دیو نے مشترکہ طور پر ٹیک کنیکٹ کانفرنس کا افتتاح بھی کیا، جس میں پاکستان اور ملائیشیا کی معروف ٹیکنالوجی کمپنیوں نے شرکت کی۔ کانفرنس کے شرکاء نے ڈیجیٹل اور آئی ٹی شعبوں میں تعاون کے نئے مواقع پر تفصیلی گفتگو کی۔

یہ ملاقات دوطرفہ تعلقات کو مضبوط بنانے اور ٹیکنالوجی کے شعبے میں شراکت داری کے نئے امکانات کو اجاگر کرنے کی جانب اہم پیش رفت ہے۔