جمعہ 15 مئی 2026 
انڈین پریمیئر لیگ(IPL) سے متعلق ایک مبینہ اسکینڈل سامنے آیا ہے جس میں کرکٹرز کو بلیک میل کرنے کے الزامات ایک اہم بورڈ عہدیدار کے سیکریٹری پر عائد کیے جا رہے ہیں۔
ذرائع کے مطابق معاملہ اس وقت شروع ہوا جب ایک کھلاڑی کو معاہدہ دلوانے کے بدلے میں بھاری کمیشن طلب کیا گیا۔ انکار کے بعد متعلقہ سیکریٹری کی جانب سے مبینہ طور پر دباؤ اور بلیک میلنگ کا سلسلہ شروع ہوا۔
سوشل میڈیا مہم میں کردار کا الزام
ذرائع کا کہنا ہے کہ معاملہ صرف مالی مطالبات تک محدود نہیں رہا بلکہ اس میں ایک صحافی کے ساتھ مل کر سوشل میڈیا پر کھلاڑی کی نجی زندگی سے متعلق مواد سامنے لانے کی کوششوں کا بھی الزام سامنے آیا ہے۔
مزیدپڑھیں:آل رائونڈر فہیم اشرف یارکشائر کے اسکواڈ میں شامل، وائیٹیلٹی بلاسٹ میں شرکت کریں گے
اس صورتحال کے بعد سوشل میڈیا پر آئی پی ایل کھلاڑیوں کے حوالے سے ہونے والی بحث میں تیزی آ گئی ہے اور مختلف دعوے اس معاملے سے جوڑے جا رہے ہیں۔
ایک اور کرکٹر سے متعلق علیحدہ معاملہ
ذرائع نے یہ بھی بتایا ہے کہ ایک اور واقعے میں ایک آئی پی ایل کھلاڑی کی قریبی خاتون سے متعلق حساس معلومات کے افشاء کا الزام سامنے آیا ہے، جسے بھی اسی سلسلے کی کڑی سمجھا جا رہا ہے۔
حکام کی خاموشی
معاملے پر موقف جاننے کے لیے جب متعلقہ بورڈ حکام سے رابطہ کیا گیا تو انہوں نے اس حوالے سے کوئی تبصرہ کرنے سے گریز کیا۔
تحقیقات کا امکان
کرکٹ حلقوں کے مطابق اگر یہ الزامات درست ثابت ہوئے تو یہ معاملہ لیگ کی ساکھ کے لیے سنگین چیلنج بن سکتا ہے، تاہم فی الحال باضابطہ طور پر کسی تحقیق یا کارروائی کا اعلان سامنے نہیں آیا۔
