ہفتہ 16 مئی 2026 
فلسطینی مزاحمتی تنظیم حماس نے تصدیق کی ہے کہ اس کے عسکری ونگ القسام بریگیڈز کے سربراہ عزالدین الحداد اسرائیلی فضائی حملے میں شہید ہو گئے ہیں۔
حماس (Hamas) کے مطابق یہ حملہ جمعہ کی شام غزہ میں کیا گیا، جس میں عزالدین الحداد کی اہلیہ، بیٹی اور دیگر فلسطینی شہری بھی جان کی بازی ہار گئے۔
تنظیم نے اسرائیلی کارروائی کو جنگ بندی معاہدے کی خلاف ورزی قرار دیتے ہوئے کہا کہ غزہ میں شہری آبادی کو مسلسل نشانہ بنایا جا رہا ہے۔
حماس کے بیان میں کہا گیا کہ عزالدین الحداد، جو ابو صہیب کے نام سے بھی معروف تھے، القسام بریگیڈز کی اہم قیادت میں شامل تھے اور انہوں نے اپنی زندگی فلسطینی عوام کے دفاع اور مزاحمت کے لیے وقف کر رکھی تھی۔
مزید پڑھیں؛الٹرا آرتھوڈوکس بھرتی تنازع: اسرائیلی حکومت سیاسی بحران کے قریب
حماس نے مزید کہا کہ اسرائیل کی جانب سے جنگ بندی کے باوجود حملوں کا سلسلہ جاری رکھنا اس بات کا ثبوت ہے کہ وہ طاقت کے ذریعے اپنے مقاصد حاصل کرنا چاہتا ہے۔
دوسری جانب اسرائیل نے گزشتہ روز دعویٰ کیا تھا کہ غزہ میں کیے گئے فضائی حملے کا ہدف عزالدین الحداد تھے۔
اسرائیلی وزیراعظم Benjamin Netanyahu اور وزیر دفاع Israel Katz نے مشترکہ بیان میں کہا تھا کہ الحداد کو نشانہ بنانے کا فیصلہ اسرائیلی فوج کو دی گئی ہدایات کے تحت کیا گیا۔
اسرائیلی حکام کے مطابق عزالدین الحداد پر اسرائیلی شہریوں اور فوجیوں کے خلاف حملوں کی منصوبہ بندی اور قیادت کے الزامات تھے۔
