اتوار 17 مئی 2026 
پاکستانی اداکارہ اور ماڈل عائشہ عمر(Ayesha Omar) نے سوشل میڈیا پر ان سے منسوب ایک وائرل بیان کو سختی سے مسترد کرتے ہوئے اسے مکمل طور پر جھوٹ اور من گھڑت قرار دیا ہے۔
یہ بیان مختلف پلیٹ فارمز پر تیزی سے پھیل رہا تھا جس میں ان کے حوالے سے غیر ازدواجی تعلقات سے متعلق متنازع بات منسوب کی گئی تھی۔
عائشہ عمر نے اس معاملے پر انسٹاگرام پر وضاحت دیتے ہوئے کہا کہ وہ نہ تو ایسی سوچ رکھتی ہیں اور نہ ہی کبھی ایسا بیان دے سکتی ہیں۔ ان کے مطابق ان کے نام سے منسوب کیا جانے والا دعویٰ سراسر غلط ہے اور اس کا حقیقت سے کوئی تعلق نہیں۔
انہوں نے اپنے پیغام میں اس بات پر بھی افسوس کا اظہار کیا کہ سوشل میڈیا پر بغیر تصدیق کے معلومات پھیلانا عام ہوتا جا رہا ہے، جس سے کسی بھی شخصیت کی ساکھ کو نقصان پہنچ سکتا ہے۔ ان کا کہنا تھا کہ جھوٹی خبریں شیئر کرنے سے پہلے حقائق کی جانچ ضروری ہے تاکہ غلط فہمیوں سے بچا جا سکے۔
مزیدپڑھیں:پنجاب، سندھ اور کے پی کے بعد بلوچستان میں بھی تجارتی سرگرمیوں میں نرمی
اداکارہ نے واضح کیا کہ دھوکا دہی یا غیر اخلاقی تعلقات ان کے ذاتی اصولوں اور سوچ کے بالکل خلاف ہیں، اور وہ اس طرح کے کسی بھی نظریے کی حمایت نہیں کرتیں۔
عائشہ عمر نے صارفین سے اپیل کی کہ وہ ایسی افواہوں کو آگے نہ بڑھائیں اور ذمہ داری کا مظاہرہ کریں۔ ان کے مطابق کسی بھی شخصیت کے بارے میں رائے قائم کرنے سے پہلے مستند ذرائع سے تصدیق کرنا لازمی ہے۔
واضح رہے کہ عائشہ عمر پاکستان کی شوبز انڈسٹری کی معروف اداکاراؤں میں شمار ہوتی ہیں اور متعدد مقبول ڈراموں اور پروجیکٹس میں اپنی اداکاری کے باعث پہچانی جاتی ہیں۔
