جمعرات 21 مئی 2026 
لاہور، پنجاب میں شدید ہیٹ ویو(heat wave) کا الرٹ جاری کر دیا گیا ہے، جس کے مطابق صوبے کے بیشتر اضلاع میں درجہ حرارت معمول سے پانچ سے سات ڈگری سینٹی گریڈ زیادہ رہنے کا امکان ہے۔ پی ڈی ایم اے کے مطابق پچیس سے اکتیس مئی کے دوران شدید گرمی کی لہر برقرار رہے گی۔
ترجمان پی ڈی ایم اے کے مطابق بالائی پنجاب میں درجہ حرارت بیالیس سے پینتالیس ڈگری جبکہ جنوبی پنجاب میں سینتالیس سے پچاس ڈگری سینٹی گریڈ تک جانے کا امکان ہے۔
راولپنڈی، لاہور، گوجرانوالہ، فیصل آباد، سیالکوٹ اور دیگر اضلاع میں بھی گرمی کی شدت میں نمایاں اضافہ متوقع ہے۔ڈی جی پی ڈی ایم اے عمر جاوید نے بتایا کہ رات کے وقت بھی موسم معمول سے زیادہ گرم رہنے کا امکان ہے۔
گرد آلود ہواؤں اور طوفان کا خطرہ بھی موجود ہے۔ریلیف کمشنر پنجاب نبیل جاوید نے تمام کمشنرز اور ڈپٹی کمشنرز کو الرٹ رہنے کی ہدایت کرتے ہوئے کہا ہے کہ وزیراعلیٰ پنجاب کی ہدایات کے مطابق انتظامیہ مکمل طور پر تیار رہے۔
انہوں نے شہریوں سے اپیل کی ہے کہ وہ صبح دس سے شام چار بجے تک براہ راست دھوپ سے گریز کریں، زیادہ پانی پئیں اور غیر ضروری سرگرمیوں سے اجتناب کریں۔
مزید پڑھیں:پس پردہ رابطے، پی ٹی آئی اور ریاستی حکام میں اعتماد کی بحالی شروع ، انصارعباسی دعویٰ
ڈی جی پی ڈی ایم اے کے مطابق ریسکیو ڈبل ون ڈبل ٹو کو ہیٹ اسٹروک اور پانی کی کمی کے کیسز سے نمٹنے کیلئے ہائی الرٹ کر دیا گیا ہے جبکہ شہری علاقوں میں امدادی کیمپ، صاف پانی، او آر ایس اور ابتدائی طبی امداد کی سہولیات فراہم کی جائیں گی۔
