منگل 30 جون 2026 
واٹس ایپ(whatsapp) نے اعلان کیا ہے کہ وہ اپنے صارفین کے لیے یوزر نیم کا نیا فیچر متعارف کروانے جا رہا ہے۔
گھر ہو یا دفتر، واٹس ایپ ہماری روزمرہ زندگی میں پیغام رسانی کا اہم حصہ بن چکا ہے کیونکہ میسجز، تصاویر اور حتیٰ کے اہم دستاویزات کے تبادلے کے لیے زیادہ تر لوگ واٹس ایپ کا ہی بطور محفوظ ایپ استعمال کرتے ہیں، لیکن کبھی کبھی آپ کچھ لوگوں سے اپنا نمبر شیئر کیے بغیر بھی رابطے میں رہنا چاہتے ہیں اور واٹس ایپ نے اب اپنے صارفین کی اس مشکل کو حل کرنے کا فیصلہ کیا ہے۔
واٹس ایپ کے مطابق اگر آپ کسی کو اپنا موبائل نمبر نہیں دینا چاہتے تو آپ ایسے شخص کو صرف اپنا واٹس ایپ یوزر نیم دے کر بھی اُس سے رابطے میں رہ سکتے ہیں۔
یعنی وہ شخص آپ کے یوزر نیم کے ذریعے ہی آپ سے واٹس ایپ پر رابطہ کر سکے گا، آپ کو اسے اپنا فون نمبر دینے کی ضرورت نہیں اور اس طرح وہ آپ کے فون نمبر پر ڈائریکٹ کال یا ٹیکس میسج بھی نہیں کر سکے گا۔
واٹس ایپ کے مطابق رواں ہفتے سے آپ اپنے لیے یوزر نیم کا انتخاب کر سکتے ہیں اور آنے والے دنوں میں جب یہ فیچر باضابطہ طور پر متعارف کروا دیا جائے گا، تاہم اِس نئے فیچر کے لیے آپ کے فون میں واٹس ایپ کا تازہ ترین ورژن ہونا ضروری ہے۔
مزیدپڑھیں:متحدہ عرب امارات نے لبنان کے سفر پر عائد پابندی اٹھالی
اس کے بعد آپ واٹس ایپ کی سیٹنگز میں اکاؤنٹ میں جا کر یوزر نیم کی ریکویسٹ کر سکتے ہیں تاہم یوزر نیم رکھنا لازمی نہیں ہو گا یعنی جب آپ چاہیں گے تو آپ اپنے نمبر کے ذریعے واٹس ایپ کا استعمال جاری رکھ پائیں گے۔
واٹس ایپ کے مطابق یوزر نیم زیادہ سے زیادہ 35 حروف پر مشتمل ہو گا اور صارفین کے پاس اپنا یوزر نیم تبدیل یا حذف کرنے کی سہولت بھی موجود ہو گی۔
کمپنی کے مطابق یہ فیچر آئندہ چند ماہ کے دوران مرحلہ وار دنیا بھر میں واٹس ایپ کے تقریباً تین ارب صارفین کے لیے دستیاب ہو گا۔
واٹس ایپ نے یہ بھی واضح کیا ہے کہ معروف شخصیات اور اعلیٰ سرکاری عہدیداروں کے نام عام صارفین کے لیے دستیاب نہیں ہوں گے تاکہ جعل سازی اور دھوکہ دہی سے بچا جا سکے۔
