ہفتہ 11 جولائی 2026 
امریکا نے اسرائیل اور حزب اللہ کے درمیان لڑائی کے خاتمے کے لیے طے پانے والے فریم ورک معاہدے پر عمل درآمد میں تعاون کے لیے ایک فوجی وفد لبنان(Lebanon) بھیج دیا ہے۔
فنانشل ٹائمز کی رپورٹ کے مطابق لبنان کے دو سینئر حکام نے بتایا کہ امریکی فوج کی سینٹرل کمان نے اپنے اہلکار بیروت روانہ کیے، یہ وفد اگلے ہفتے روم میں لبنان اور اسرائیل کے درمیان ہونے والے تکنیکی مذاکرات سے قبل پہنچا ہے۔
رپورٹ کے مطابق ان مذاکرات میں 26 جون کو امریکا کی سرپرستی میں طے پانے والے فریم ورک معاہدے پر عمل درآمد کا جائزہ لیا جائے گا، جس کے تحت اسرائیلی افواج مرحلہ وار لبنانی علاقے سے انخلا کریں گی۔
مزیدپڑھیں:امریکا کا آبنائے ہرمز کھلی رکھنے اور حملے روکنے کیلئے ایران کو الٹی میٹم
ترکی کی خبر رساں ایجنسی انادولو کے مطابق امریکی محکمہ خارجہ کے ایک ترجمان نے تصدیق کی ہے کہ سینٹ کام لبنان اور اسرائیل دونوں کے ساتھ قریبی رابطے میں ہے۔
ترجمان نے انادولو کو بتایا کہ اسرائیل اور لبنان کے درمیان معاہدہ اب عمل درآمد کے مرحلے میں داخل ہو چکا ہے، جبکہ پہلے پائلٹ زون، جہاں سے اسرائیلی افواج کے انخلا کی توقع ہے، کا آغاز آئندہ چند روز میں ہونے کا امکان ہے۔
