راولپنڈی، اسلام آباد میں آٹے کی قلت کا خدشہ

راولپنڈی اور اسلام آباد میں آٹے کی فراہمی متاثر ہونے لگی ہے، جس کے بعد دونوں شہروں میں آٹے کی قلت اور روٹی و نان کی قیمتوں میں اضافے کا خدشہ پیدا ہو گیا ہے۔ یہ صورتحال پنجاب فوڈ ڈیپارٹمنٹ (Punjab Food Department) کی جانب سے وفاقی دارالحکومت اور راولپنڈی ڈویژن کی فلور ملز کے لیے گندم کے کوٹے کے پرمٹ معطل کیے جانے کے بعد سامنے آئی ہے۔

ذرائع کے مطابق گندم کے کوٹے کی معطلی کے باعث متعدد فلور ملز کی پیداوار متاثر ہوئی ہے، جس کے نتیجے میں روٹی کی قیمت 17 روپے سے بڑھ کر 25 روپے تک پہنچ گئی، جبکہ نان کی قیمت میں بھی اضافہ ریکارڈ کیا گیا ہے۔

پاکستان فلور ملز ایسوسی ایشن (Pakistan Flour Mills Association) اور پنجاب فلور ملز ایسوسی ایشن (Punjab Flour Mills Association) نے دعویٰ کیا ہے کہ تقریباً 8 ہزار ٹن گندم کے کوٹے سے متعلق جاری کیے گئے پرمٹ منسوخ کر دیے گئے ہیں، جس سے آٹے کی سپلائی شدید متاثر ہوئی ہے۔

ایسوسی ایشنز نے حکومت سے مطالبہ کیا ہے کہ گندم کا کوٹہ فوری طور پر بحال کیا جائے اور گندم کی نقل و حمل پر عائد پابندیاں ختم کی جائیں تاکہ فلور ملز معمول کے مطابق کام دوبارہ شروع کر سکیں۔

مزیدپڑھیں:قائمہ کمیٹی کی ایپل کو پاکستان لانے کی سفارش،وزارت آئی ٹی کو ایپل سے رابطے کی ہدایت

فلور ملز نمائندوں نے خبردار کیا ہے کہ اگر حکومت نے اپنا فیصلہ واپس نہ لیا تو پنجاب بھر کی فلور ملز اظہارِ یکجہتی کے طور پر اپنی پیداوار بند کر سکتی ہیں، جس سے صوبے میں آٹے کا مزید بحران پیدا ہونے کا خدشہ ہے۔

انہوں نے وزیراعلیٰ پنجاب مریم نواز (Maryam Nawaz) سے فوری مداخلت کی اپیل کرتے ہوئے مطالبہ کیا کہ عوامی مفاد میں گندم کے کوٹے کی بحالی اور آٹے کی بلا تعطل فراہمی کو یقینی بنایا جائے۔