منگل 21 جولائی 2026 
ملک بھر میں سونے کی قیمت میں نمایاں اضافہ ریکارڈ کیا گیا ہے، جس کے بعد فی تولہ سونا 4 لاکھ 29 ہزار روپے کی سطح سے تجاوز کر گیا، جبکہ عالمی مارکیٹ میں بھی قیمتی دھات کی قیمت میں نمایاں اضافہ دیکھنے میں آیا ہے۔
آل پاکستان صرافہ جیمز اینڈ جیولرز ایسوسی ایشن کے مطابق فی تولہ سونے کی قیمت میں4 ہزار 700 روپے کا اضافہ ہوا، جس کے بعد نئی قیمت 4 لاکھ 29 ہزار 236 روپے مقرر ہو گئی۔
اسی طرح 10 گرام سونے کی قیمت میں4 ہزار 29 روپے اضافہ ریکارڈ کیا گیا، جس کے بعد اس کی نئی قیمت 3 لاکھ 68 ہزار روپے ہو گئی۔
دوسری جانب چاندی کی قیمت میں بھی اضافہ دیکھنے میں آیا۔ صرافہ ایسوسی ایشن کے مطابق فی تولہ چاندی 219 روپے مہنگی ہو کر 6 ہزار 396 روپے تک پہنچ گئی۔
عالمی مارکیٹ میں بھی سونے کی قیمت میں 47 ڈالر فی اونس اضافہ ہوا، جس کے بعد فی اونس سونے کی قیمت 4 ہزار 68 ڈالر تک جا پہنچی۔
ماہرین کے مطابق عالمی سطح پر سونے کی قیمتوں میں اضافے کی بڑی وجوہات عالمی معاشی غیر یقینی صورتحال، امریکی ڈالر کی قدر میں اتار چڑھاؤ، مختلف ممالک کے مرکزی بینکوں کی جانب سے سونے کی مسلسل خریداری اور دنیا کے مختلف خطوں میں بڑھتی ہوئی جغرافیائی و سیاسی کشیدگی ہیں۔
اقتصادی ماہرین کا کہنا ہے کہ غیر یقینی معاشی حالات میں سرمایہ کار سونے کو محفوظ سرمایہ کاری تصور کرتے ہیں، جس کے باعث اس کی طلب میں مسلسل اضافہ ہو رہا ہے۔ اس کے علاوہ اگر امریکی فیڈرل ریزرو مستقبل میں شرح سود میں کمی کرتا ہے تو سونے کی قیمتوں کو مزید سہارا مل سکتا ہے، کیونکہ کم شرح سود کی صورت میں سونے میں سرمایہ کاری نسبتاً زیادہ پرکشش ہو جاتی ہے۔
ماہرین نے پیش گوئی کی ہے کہ اگر عالمی سیاسی کشیدگی اور معاشی خدشات برقرار رہے تو آنے والے دنوں میں سونے کی قیمتوں میں مزید اضافہ ہو سکتا ہے، تاہم امریکی ڈالر کی مضبوطی یا عالمی مالیاتی پالیسی میں تبدیلی کی صورت میں قیمتوں میں اتار چڑھاؤ بھی متوقع ہے۔
