جمعہ 18 ستمبر 2026 
نیدرلینڈز کے شہر روٹرڈیم میں دنیا کا پہلا تیرتا ہوا فارم گزشتہ کئی برس سے کام کر رہا ہے جہاں شہریوں کے قریب صحت مند خوراک تیار کرنے کے ساتھ ماحول دوست اور جدید زرعی طریقے اختیار کیے جا رہے ہیں۔
مئی 2019 سے روٹرڈیم میں دنیا کا پہلافلوٹنگ فارم کام کر رہا ہے۔ دنیا بھر سے ہزاروں افراد اس فارم کا دورہ کر چکے ہیں تاکہ یہ دیکھ سکیں کہ مقامی اور سرکلر یعنی گردشی بنیادوں پر خوراک کیسے تیار کی جاتی ہے۔
فلوٹنگ فارم میں شہروں کے اندر صارفین کے بالکل قریب صحت مند خوراک تیار کی جاتی ہے۔ خوراک کی پیداوار پائیدار اور جدید طریقے سے کی جاتی ہے جبکہ جانوروں کی فلاح و بہبود کو بھی اولین ترجیح دی جاتی ہے۔
فلوٹنگ فارم کے لیے خوراک کا ضیاع روکنا، خوراک کی نقل و حمل کم کرنا اور خوراک کے معیار کو بہتر بنانا انتہائی اہم ہے۔
فارم کو دوبارہ شہر کے اندر لانا صاف ستھرے، قابلِ رہائش اور باشعور شہری ماحول کی تشکیل کا حصہ سمجھا جاتا ہے، جسے فارم کی انتظامیہ ’’ٹرانسفارمیشن‘‘ کا نام دیتی ہے۔
جدید زراعت
فلوٹنگ فارم میں سرکلر زراعت صرف خوراک کی پیداوار تک محدود نہیں بلکہ فارم سے حاصل ہونے والی باقی چیزوں کے نئے استعمال بھی تلاش کیے جاتے ہیں۔
فارم میں گائے کے گوبر سے ماحول دوست مصنوعات تیار کی جاتی ہیں تاکہ کھاد کے اضافی استعمال کے مسئلے سے نمٹا جا سکے۔ اسی سلسلے میںاسٹوڈیو لنڈے کیفشیا کے تعاون سے گائے کے گوبر سے پودوں کے گملے بھی تیار کیے گئے ہیں۔
فارم انتظامیہ کے مطابق اسے صوبہ ساؤتھ ہالینڈ کی درخواست پر پرنسس ڈے کے لیے مائیکرو گرینز والے پودوں کے گملے فراہم کرنے کا موقع بھی ملا۔
یہ اس بات کو ظاہر کرنے کا ایک موقع تھا کہ فارم سے حاصل ہونے والی باقی چیزوں کو سرکلر مستقبل میں دوبارہ قیمتی اور کارآمد مصنوعات کے طور پر استعمال کیا جا سکتا ہے۔
پانی کی سطح کے نیچے سبزیاں
فلوٹنگ فارم کے نچلے حصے میں ایک نیا ورٹیکل فارم بھی قائم کیا گیا ہے، جہاں مائیکرو گرینز لفظی طور پر پانی کی سطح کے نیچے اگائی جاتی ہیں۔
یہاں سبزیاں ایک ایسے بند نظام میں اگائی جاتی ہیں جس میں روایتی کاشت کے مقابلے میں85 فیصد کم پانی استعمال ہوتا ہے اور یہ نظام مکمل طور پر کیڑے مار ادویات سے پاک ہے۔
فارم نے ایسی چھوٹی سبزیوں سے کام شروع کیا ہے جن میں مکمل طور پر تیار پودے کے مقابلے میں40 فیصد تک زیادہ غذائی اجزا موجود ہوتے ہیں۔
اس کے علاوہ یہاںتلسی اورلیموں کی خوشبو والی جڑی بوٹی بھی اگائی جاتی ہے۔
یہ مائیکرو گرینز اور جڑی بوٹیاں سلاد، سینڈوچ اور پنیر کے ساتھ استعمال کی جا سکتی ہیں اور کھانے میں ذائقہ بھی بڑھاتی ہیں۔
موسمیاتی تبدیلی کے اثرات سے نمٹنے کی کوشش
فلوٹنگ فارم کا مقصد موسمیاتی تبدیلی سے متاثرہ دنیا میں صارفین کے قریب صحت مند خوراک پیدا کرنا ہے۔
دنیا بھر میں زراعت کو خشک سالی، سیلاب اور سمندر کی سطح میں اضافے جیسے مسائل کا سامنا ہے۔
پانی پر فارم تعمیر کرکے فلوٹنگ فارم موسمیاتی تبدیلی کے ان چیلنجز سے نمٹنے کے لیے پہلے ہی سے تیاری کر رہا ہے۔
