جمعہ 25 ستمبر 2026 
عالمی مارکیٹ میں سونے کی قیمت(Gold Rates) میں جمعہ کو معمولی اضافہ ریکارڈ کیا گیا، تاہم مضبوط امریکی ڈالر اور امریکی فیڈرل ریزرو کی جانب سے مہنگائی پر قابو پانے کے لیے شرح سود بلند رکھنے کی توقعات کے باعث رواں ہفتے مجموعی طور پر سونے کی قیمت میں تقریباً 2 فیصد کمی ہوچکی ہے۔
بین الاقوامی مارکیٹ میں اسپاٹ گولڈ کی قیمت 0.2 فیصد اضافے کے بعد 4,288.36 ڈالر فی اونس ہوگئی، جبکہ امریکی گولڈ فیوچرز 0.6 فیصد اضافے کے ساتھ 4,323.10 ڈالر فی اونس پر پہنچ گئے۔
مارکیٹ میں امریکی ڈالر کی قدر بھی ہفتہ وار بنیاد پر اضافے کی جانب گامزن ہے، جس کے باعث دیگر کرنسیوں میں سونا خریدنے والے سرمایہ کاروں کے لیے قیمتی دھات نسبتاً مہنگی ہوگئی ہے۔ امریکی ٹریژری بانڈز کی ییلڈ میں بھی مسلسل اضافہ دیکھا جا رہا ہے، جو سونے کی قیمت پر دباؤ ڈالنے والے عوامل میں شامل ہے۔
او اے این ڈی اے کے سینئر مارکیٹ تجزیہ کار کیلون وونگ (Kelvin Wong) کے مطابق آنے والے دنوں میں سرمایہ کاروں کی توجہ امریکی شرح سود کی سمت پر مرکوز رہے گی۔ ان کا کہنا ہے کہ اگر مارکیٹ میں فیڈرل ریزرو کی جانب سے نسبتاً سخت مالیاتی پالیسی برقرار رکھنے کی توقعات مضبوط ہوتی ہیں تو امریکی ڈالر مزید مستحکم ہوسکتا ہے، جس کا سونے کی قیمت پر منفی اثر پڑ سکتا ہے۔
مزیدپڑھیں:پی ٹی آئی احتجاج: اسلام آباد میں راستوں کی صورتحال کیا ہے؟
گزشتہ ہفتے امریکی فیڈرل ریزرو کی جانب سے شرح سود میں 0.25 فیصد اضافہ کیا گیا تھا۔ اس کے بعد فیڈ کے دو عہدیداروں کی جانب سے مزید شرح سود میں اضافے کی ضرورت کا عندیہ دیا گیا، جس سے یہ توقعات مضبوط ہوئی ہیں کہ بلند شرح سود کا دورانیہ طویل ہوسکتا ہے۔
شرح سود بلند رہنے کی صورت میں عام طور پر غیر سودی اثاثے سمجھے جانے والے سونے کی کشش پر دباؤ بڑھتا ہے، جبکہ مضبوط ڈالر بھی عالمی خریداروں کے لیے سونے کی لاگت میں اضافہ کرتا ہے۔
تاہم، عالمی سطح پر جاری جغرافیائی سیاسی کشیدگی اور مختلف ممالک کے بڑھتے ہوئے سرکاری قرضوں کے باعث سونے کی محفوظ سرمایہ کاری کے طور پر طلب برقرار رہنے کی توقع بھی کی جا رہی ہے۔ ان عوامل کے باعث سرمایہ کار معاشی اور مالیاتی غیر یقینی صورتحال کے دوران سونے کو اپنے پورٹ فولیو میں شامل رکھنے کو ترجیح دے سکتے ہیں۔
دوسری قیمتی دھاتوں میں چاندی کی قیمت 0.1 فیصد کمی کے بعد 63.81 ڈالر فی اونس ہوگئی، جبکہ پلاٹینم 0.5 فیصد اضافے کے ساتھ 1,756.90 ڈالر فی اونس پر پہنچ گیا۔ پیلاڈیم کی قیمت میں 1.3 فیصد کمی ریکارڈ کی گئی اور یہ 1,257.56 ڈالر فی اونس ہوگیا۔
