اتوار 26 اکتوبر 2025 
سینئر اداکارہ نادیہ افگن نے والد کے انتقال کے وقت اپنے تجربے کو یاد کرتے ہوئے بتایا کہ وہ رات دیر تک مہمان نوازی میں مصروف رہیں اور بار بار تعزیت کے لیے آئے مہمانوں سے پوچھتی رہیں کہ کیا انہوں نے کھانا کھایا یا نہیں۔
نادیہ افگن نے حال ہی میں انسٹاگرام پر ایک ریل شیئر کرتے ہوئے جنازے پر مہمانوں کو کھانا کھلانے کے رواج پر تنقید کی ہے۔
اداکارہ نے لکھا کہ ان کے والد کے انتقال کے وقت سب سے زیادہ پریشان کن پہلو یہ تھا کہ کالونی کے انچارج ان کے پاس آئے اور پوچھا کہ کرسیاں، ٹینٹ اور کھانا کہاں سے کروانا ہے۔
نادیہ افگن کے مطابق اس دن وہ رات دیر تک صرف مہمان نوازی میں مصروف رہیں اور بار بار تعزیت کے لیے آنے والے مہمانوں سے یہی پوچھتی رہیں کہ کیا انہوں نے کھانا کھایا یا نہیں اور انہیں کسی چیز کی ضرورت تو نہیں۔
اداکارہ نے مزید کہا کہ وہ چاہتی ہیں کہ جب ان کا انتقال ہو تو واضح ہدایت کے ساتھ یہ طے کیا جائے کہ ان کے جنازے میں آنے والے کسی شخص کو کھانا نہیں دیا جائے گا۔
نادیہ افگن کا کہنا تھا کہ اب جس نے آنا ہے آئے اور جس نے نہیں آنا وہ نہ آئے۔
