پیر 26 اکتوبر 2026 
ایڈیشنل ڈائریکٹر نیشنل سائبر کرائم انویسٹی گیشن ایجنسی (NCCIA) اسلام آباد شعیب خان نے کہا ہے کہ وزیرِ داخلہ محسن نقوی کی ہدایات پر افسران کی پیشہ ورانہ صلاحیتیں بڑھانے کے لیے مقامی اور بین الاقوامی سطح پر تربیتی پروگرام جاری ہیں جبکہ وہ خود بھی تربیت کے سلسلے میں چین جائیں گے۔
میڈیا سے گفتگو کرتے ہوئے شعیب خان نے کہا کہ بین الاقوامی تربیت کا مقصد سائبر کرائم کی تحقیقات میں مہارت بڑھانا، دوسرے ممالک کے متعلقہ اداروں کے ساتھ تعاون کو فروغ دینا اور ان کے تجربات سے استفادہ کرنا ہے۔
وزیرِ داخلہ محسن نقوی کی ہدایات کے مطابق این سی سی آئی اے کے افسران کی پیشہ ورانہ تربیت کا سلسلہ جاری ہے، جس کے تحت افسران مختلف ممالک میں سائبر کرائم کی تحقیقات، جدید ٹیکنالوجی اور بین الاقوامی طریقۂ کار سے متعلق تربیت حاصل کریں گے۔
ایڈیشنل ڈائریکٹر این سی سی آئی اے اسلام آباد… pic.twitter.com/yuNdX9hVX8— NCCIA (@NCCIAOFFICIAL) October 26, 2026
انہوں نے کہا کہ مختلف ممالک کی سائبر پولیس کس طرح کام کرتی ہے، بین الاقوامی سطح پر رابطہ کاری اور نیٹ ورکنگ کیسے کی جاتی ہے اور پاکستان میں سائبر کرائم کی تحقیقات کے نظام کو مزید مؤثر کیسے بنایا جاسکتا ہے، یہ تربیتی پروگراموں کے اہم پہلو ہیں۔
شعیب خان نے بتایا کہ میں بھی تربیت کے لیے چین جا رہا ہوں تاکہ اس شعبے میں مزید مہارت حاصل کی جاسکے اور دوسرے ممالک کے اداروں کے ساتھ کام کرنے کے طریقۂ کار کو بہتر طور پر سمجھا جاسکے۔
انہوں نے مزید کہا کہ این سی سی آئی اے کے افسران کی صلاحیتوں میں اضافے کے لیے مقامی تربیت کا سلسلہ بھی جاری ہے جبکہ بین الاقوامی تربیتی پروگراموں کے ذریعے انہیں جدید طریقۂ تفتیش اور دوسرے ممالک کے تجربات سے آگاہ کیا جا رہا ہے۔
شعیب خان کا کہنا تھا کہ ان اقدامات کا مقصد پاکستان میں سائبر کرائم سے نمٹنے کی صلاحیت بہتر بنانا اور بدلتے ہوئے ڈیجیٹل جرائم کی تحقیقات کے لیے افسران کو جدید مہارتوں سے آراستہ کرنا ہے۔
