وفاقی وزیر داخلہ محسن نقوی نے واضح کیا ہے کہ پولیس افسر کے گھر بچی کی ہلاکت کے افسوسناک معاملے پر کسی قسم کے دباؤ کو خاطر میں لائے بغیر انتہائی سخت اور شفاف تفتیش کی جائے گی، جبکہ اسلام آباد ایکسپریس وے کو موٹروے کی طرز پر جدید خطوط پر استوار کیا جا رہا ہے۔
میڈیا رپورٹس کے مطابق وفاقی وزیر داخلہ محسن نقوی نے اسلام آباد میں ایکسپریس وے سروس روڈ منصوبے کے دورے کے موقع پر میڈیا نمائندوں سے گفتگو کرتے ہوئے ایک سوال کے جواب میں بتایا کہ پولیس افسر کے گھر بچی کی موت کے معاملے پر پولیس پر شدید دباؤ تھا، تاہم پولیس نے قانون کی بالادستی قائم رکھتے ہوئے نہ صرف مقدمہ درج کیا بلکہ ملزمان کو گرفتار بھی کر لیا، حالانکہ متاثرہ بچی کا والد ایف آئی آر درج نہیں کروانا چاہتا تھا۔ انہوں نے دوٹوک الفاظ میں یقین دلایا کہ پولیس اس مقدمے کی تگڑی تفتیش کر رہی ہے اور آئندہ بھی کرے گی۔ اس موقع پر ماحولیاتی بہتری کا ذکر کرتے ہوئے انہوں نے بتایا کہ سپارکو کی حالیہ رپورٹ کے مطابق وفاقی دارالحکومت اسلام آباد میں گزشتہ ڈیڑھ سال کے دوران درختوں کی تعداد میں 28 فیصد نمایاں اضافہ ہوا ہے اور شجرکاری مہم کے تحت مزید درخت بھی لگائے جا رہے ہیں۔
میڈیا رپورٹس کے مطابق وزیر داخلہ نے ایکسپریس وے سروس روڈ منصوبے پر جاری تعمیراتی کام کی رفتار اور پیش رفت کا تفصیلی جائزہ لینے کے بعد کہا کہ گیس پائپ لائن کی منتقلی کے باعث پراجیکٹ کی تکمیل میں کچھ رکاوٹیں درپیش تھیں، جنہیں اب مکمل طور پر دور کر لیا گیا ہے۔ انہوں نے اعلان کیا کہ آئندہ 60 روز کے اندر سروس روڈ منصوبے کو مکمل کر لیا جائے گا، جس سے اس شاہراہ سے ملحقہ آبادیوں کے شہریوں کو آمدورفت میں بے پناہ سہولت میسر آئے گی۔ محسن نقوی نے مزید کہا کہ اسلام آباد ایکسپریس وے کو موٹروے طرز پر بنانے کا کام تیزی سے جاری ہے جبکہ کورال چوک سے آگے بھی سروس روڈ کو توسیع دینے پر غور کیا جا رہا ہے، اور اب تک اس منصوبے کا 40 فیصد کام مکمل ہو چکا ہے جسے مقررہ مدت کے اندر پایہ تکمیل تک پہنچا دیا جائے گا۔













منگل 17 نومبر 2026 
