پاک افغان کشیدگی میں کمی کیلئے شٹل ڈپلومیسی جاری رکھیں گے، چین

پاکستان اور افغانستان کے درمیان کشیدگی کم کرانے کیلئے ثالثی کی کوششوں پر چین نے بیان میں کہا ہے کہ گزشتہ ہفتے چینی وزیر خارجہ نے پاک افغان وزرائے خارجہ سے ٹیلیفون پر بات کی۔

بیجنگ سے چینی ترجمان کے مطابق چین کے خصوصی ایلچی برائے افغان امور افغانستان اور پاکستان کے درمیان شٹل ڈپلومیسی میں مصروف ہیں۔

ترجمان چینی وزارت خارجہ کے مطابق چین کے سفارتخانے بھی دونوں ممالک کیساتھ قریبی رابطے میں ہیں، چین نے افغانستان اور پاکستان سے تحمل کا مظاہرہ کرنے اور کشیدگی کم کرنے کی اپیل کی ہے۔

پاک افغان کشیدگی، چین متحرک، تنازع طاقت نہیں مذاکرات اور مکالمے سے طے کریں، چینی وزیر خارجہ وانگ ای

چینی وزارت خارجہ کے مطابق چین نے دونوں ممالک پر زور دیا کہ جلد از جلد آمنے سامنے مذاکرات شروع کریں۔ چین نے فوری جنگ بندی اور اختلافات کو مذاکرات کے ذریعے حل کرنے کی امید ظاہرکی ہے۔

ترجمان نے کہا کہ افغانستان اورپاکستان کے درمیان مفاہمت کو فروغ دینے اور کشیدگی کم کرنے کی کوششیں جاری رکھیں گے۔