ٹی آر ایف بھارتی خفیہ ایجنسیوں کا مہرہ، بھارتی متضاد بیانات سے پہلگام فالس فلیگ کی حقیقت آشکار

پہلگام(Pahalgam) واقعہ کے دوران بھارتی پروپیگنڈا مشینری پر سیکیورٹی ناکامی چھپانے کے لیے جھوٹ اور گمراہ کن بیانیہ اختیار کرنے کے الزامات سامنے آئے ہیں، جبکہ مختلف دعوؤں میں واضح تضادات نے معاملے کو مزید مشکوک بنا دیا ہے۔

ذرائع کے مطابق بھارتی میڈیا نے حسبِ روایت بغیر کسی ٹھوس شواہد کے واقعے کو پاکستان سے جوڑنے کی کوشش کی اور من گھڑت رپورٹس کے ذریعے ایک مخصوص بیانیہ تشکیل دیا۔ اس دوران کالعدم تنظیم دی ریزسٹنس فرنٹ (TRF) کو حملے کا ذمہ دار قرار دیا گیا، تاہم چند دن بعد اسی تنظیم کی جانب سے اس واقعے میں ملوث ہونے کی تردید سامنے آ گئی، جس نے ابتدائی دعوؤں کی ساکھ پر سوالات کھڑے کر دیے۔

تجزیہ کاروں کا کہنا ہے کہ اس طرح کے متضاد بیانات اس امر کی نشاندہی کرتے ہیں کہ واقعے کے حقائق واضح ہونے سے قبل ہی اسے ایک مخصوص سمت دینے کی کوشش کی گئی۔ ان کے مطابق ماضی میں بھی ایسے واقعات کے بعد بغیر تحقیقات پاکستان پر الزامات عائد کیے جاتے رہے ہیں۔

مزیدپڑھیں:پہلگام فالس فلیگ آپریشن میں بھارتی خفیہ ایجنسی “را” کامکروہ کرداربے نقاب،خفیہ دستاویز منظرِعام پر
نائب وزیراعظم Ishaq Dar نے اس معاملے پر عالمی سطح پر پاکستان کا مؤقف پیش کرتے ہوئے شواہد کی بنیاد پر الزامات کو مسترد کیا اور مؤقف اپنایا کہ کسی بھی واقعے کی غیر جانبدارانہ تحقیقات ضروری ہیں۔

ماہرین کے مطابق اگر کسی تنظیم کے کردار سے متعلق دعوے خود اس کے اپنے بیانات سے متصادم ہوں اور ان کے حق میں کوئی ٹھوس شواہد بھی سامنے نہ آئیں تو اس سے پورے بیانیے کی ساکھ متاثر ہوتی ہے۔ ان کا کہنا ہے کہ ایسے معاملات میں شفاف تحقیقات اور مصدقہ معلومات ہی حقیقت تک پہنچنے کا واحد ذریعہ ہیں۔
تجزیہ کاروں نے اس بات پر زور دیا کہ خطے میں کشیدگی کم کرنے کے لیے ذمہ دارانہ طرزِ عمل اور حقائق پر مبنی رپورٹنگ ناگزیر ہے، بصورت دیگر غیر مصدقہ الزامات صورتحال کو مزید پیچیدہ بنا سکتے ہیں۔