اتوار 17 مئی 2026 
حکومت نے طیاروں میں استعمال ہونے والے ایندھن یعنی جیٹ فیول (jet fuel)کی قیمت میں بڑی کمی کا اعلان کر دیا ہے، جس کے بعد فضائی شعبے کے اخراجات کم ہونے اور ہوائی سفر کے کرایوں میں نرمی آنے کا امکان ظاہر کیا جا رہا ہے۔
سرکاری اعلان کے مطابق جیٹ فیول کی قیمت میں 111 روپے 44 پیسے فی لیٹر کمی کی گئی ہے، جس کے بعد نئی قیمت 330 روپے 22 پیسے فی لیٹر مقرر کر دی گئی۔ اس سے قبل جیٹ فیول 441 روپے 66 پیسے فی لیٹر میں فروخت ہو رہا تھا۔
مزیدپڑھیں:نظریاتی صحافت کا بڑا نام الطاف حسن قریشی دنیا سے رخصت
ماہرین کے مطابق جیٹ فیول کی قیمتوں میں یہ نمایاں کمی ایئرلائنز کے آپریشنل اخراجات کم کرنے میں مددگار ثابت ہو سکتی ہے کیونکہ فضائی کمپنیوں کے مجموعی اخراجات میں ایندھن کا حصہ انتہائی اہم سمجھا جاتا ہے۔
فضائی شعبے سے وابستہ حلقوں کا کہنا ہے کہ اگر عالمی منڈی میں تیل کی قیمتوں میں استحکام برقرار رہا تو آئندہ دنوں میں اندرونِ ملک اور بین الاقوامی پروازوں کے کرایوں میں بھی کمی دیکھنے میں آ سکتی ہے، جس سے مسافروں کو ریلیف ملنے کا امکان ہے۔
دوسری جانب اقتصادی ماہرین کا کہنا ہے کہ ایندھن کی قیمتوں میں کمی نہ صرف ایئرلائن انڈسٹری بلکہ کارگو اور فضائی ترسیل کے شعبے پر بھی مثبت اثرات مرتب کر سکتی ہے۔
