بدھ 17 ستمبر 2025 
اسلام آباد: ایچ پی وی ویکسین مہم کے سلسلے میں قومی سطح پر پارلیمانی قیادت کے ہمراہ آگاہی سیمینار کا انعقاد کیا گیا۔ وفاقی وزیر صحت مصطفیٰ کمال نے سیمینار سے خطاب کرتے ہوئے کہا کہ سروائیکل کینسر سے بچاؤ کی قومی مہم کا آغاز ایک تاریخی قدم ہے۔
وزیر صحت نے انکشاف کیا کہ پاکستان میں ہر سال تقریباً 5 ہزار خواتین اس مرض میں مبتلا ہوتی ہیں، جبکہ 3 ہزار اپنی جان کی بازی ہار جاتی ہیں۔ انہوں نے کہا کہ دنیا کے 150 سے زائد ممالک اپنے قومی ویکسینیشن پروگرامز میں ایچ پی وی ویکسین شامل کر چکے ہیں اور پاکستان نے بھی اپنی خواتین اور بچیوں کے تحفظ کے لیے یہ عملی قدم اٹھایا ہے۔
ان کا کہنا تھا کہ مہم کا پہلا مرحلہ پنجاب، اسلام آباد، سندھ اور آزاد جموں و کشمیر میں جاری ہے، جبکہ بلوچستان، خیبرپختونخوا اور گلگت بلتستان نے دوسرے مرحلے کے آغاز کے لیے وقت طلب کیا ہے۔
وزیر صحت نے جھوٹے پروپیگنڈے کو سختی سے مسترد کرتے ہوئے کہا: “ایچ پی وی ویکسین عالمی سطح پر تسلیم شدہ ہے، عوام جھوٹے اور منفی پروپیگنڈے پر یقین نہ کریں۔ اگر کوئی خاتون پروپیگنڈے کی وجہ سے ویکسین نہ لگوائے اور کینسر میں مبتلا ہو جائے تو اس کی ذمہ داری کون قبول کرے گا؟”
انہوں نے مزید کہا کہ جھوٹ پھیلانے والے خدا سے ڈریں، ہر چیز کو سیاست کی نذر نہ کریں، اور یاد رکھیں کہ جھوٹے پروپیگنڈے کا حساب دنیا و آخرت میں دینا ہوگا۔
سروے رپورٹس کا حوالہ دیتے ہوئے مصطفیٰ کمال نے کہا کہ پاکستان میں بیماریوں کی وجہ سے ایک کروڑ 30 لاکھ افراد سطح غربت سے نیچے جا چکے ہیں۔
انہوں نے والدین پر زور دیا کہ وہ اس موقع سے فائدہ اٹھائیں، اپنی بچیوں کو اس موذی مرض سے بچائیں اور ویکسینیشن کو یقینی بنائیں۔ ان کا کہنا تھا کہ “صحت سیاست سے بالاتر ہے اور قوم کی بیٹیوں کی حفاظت ہم سب کی اجتماعی ذمہ داری ہے۔”
