بدھ 15 جولائی 2026 
پاکستان تحریک انصاف (PTI) کے چیف وہیپ قومی اسمبلی ملک عامر ڈوگر (Malik Aamir Dogar) نے قومی اسمبلی کی قائمہ کمیٹیوں کے بائیکاٹ کے خاتمے سے متعلق خبروں کی تردید کرتے ہوئے کہا ہے کہ پارٹی کا فیصلہ تاحال برقرار ہے اور قائمہ کمیٹیوں میں واپسی کا کوئی فیصلہ نہیں کیا گیا۔
ملک عامر ڈوگر نے واضح کیا کہ تحریک انصاف قائمہ کمیٹیوں کے بائیکاٹ کے معاملے پر اپنے اصولی مؤقف پر قائم ہے۔ انہوں نے کہا کہ قائمہ کمیٹیوں میں واپسی سے متعلق گردش کرنے والی خبریں درست نہیں اور اسمبلی سیکرٹریٹ کو واپسی کے حوالے سے آگاہ کرنے کی اطلاعات میں کوئی حقیقت نہیں۔
چیف وہیپ اپوزیشن قومی اسمبلی کے مطابق قائمہ کمیٹیوں کے بائیکاٹ کا فیصلہ پارٹی کے بانی چیئرمین عمران خان (Imran Khan) کی ہدایت پر کیا گیا تھا، اس لیے بائیکاٹ ختم کرنے یا جاری رکھنے سے متعلق کوئی بھی فیصلہ ان سے مشاورت کے بعد ہی کیا جائے گا۔
مزیدپڑھیں:فیفا ورلڈکپ: فائنل کے دوران ہاف ٹائم معمول سے زیادہ طویل کیوں ہوگا؟
انہوں نے کہا کہ بانی چیئرمین عمران خان سے ملاقات اور مشاورت کے بغیر پارٹی اس معاملے پر کوئی حتمی فیصلہ نہیں کر سکتی۔ ان کے مطابق پی ٹی آئی اور اپوزیشن اتحاد بھی قائمہ کمیٹیوں میں واپسی سے قبل بانی چیئرمین سے رہنمائی حاصل کرنا چاہتے ہیں۔
ملک عامر ڈوگر نے کہا کہ قائمہ کمیٹیوں میں واپسی سے متعلق زیر گردش اطلاعات میں کوئی صداقت نہیں، جبکہ پارٹی کا موجودہ مؤقف اور بائیکاٹ کا فیصلہ بدستور قائم ہے۔
