اتوار 9 اگست 2026 
ہیومنٹیک پرائیویٹ لمیٹڈ (Humanetek Pvt Ltd.) نے پاکستان کے معروف بحران سے نمٹنے اور خاندانی نگہداشت کے پلیٹ فارمز محافِظ (Mohafiz) اور محسِن (Mohsyn) کی نگرانی کرنے والی کمپنی کی جانب سے لیفٹیننٹ ایس ایس پی (ر) احمد محی الدین کو چیف پبلک ٹرسٹ آفیسر مقرر کرنے کا اعلان کردیا۔
احمد محی الدین پاکستان پولیس سروس کے سابق بی ایس-19 افسر ہیں جبکہ اس سے قبل پاکستان نیوی میں لیفٹیننٹ کے طور پر بھی خدمات انجام دے چکے ہیں۔ وہ سکیورٹی، بحران سے نمٹنے، عوامی تحفظ اور قیادت کے شعبوں میں دو دہائیوں سے زائد کا وسیع تجربہ رکھتے ہیں۔ ان کے پیشہ ورانہ کیریئر کا بڑا حصہ ایسے حساس اور خطرناک ماحول میں گزرا جہاں عام شہریوں کے تحفظ اور فوری بحران سے نمٹنے کو بنیادی اہمیت حاصل رہی۔
احمد محی الدین عوامی سطح پر کھلی کچہریوں اور موقع پر انصاف کی فراہمی کے حوالے سے بھی نمایاں شناخت رکھتے ہیں۔ اپنے سرکاری کیریئر کے دوران انہوں نے عوامی مسائل کو ترجیح دیتے ہوئے براہ راست لوگوں سے رابطہ قائم رکھا، جس کے باعث انہیں عوام میں اعتماد اور پذیرائی حاصل ہوئی۔ سرکاری شعبے سے باہر آنے کا ان کا فیصلہ محض نظام پر تنقید کرنے کے بجائے مسائل کے عملی حل، ادارہ جاتی اعتماد کے فروغ اور شہریوں کو بہتر خدمات فراہم کرنے کے عزم کی عکاسی کرتا ہے۔
بطور چیف پبلک ٹرسٹ آفیسر احمد محی الدین ہیومنٹیک کی جانب سے فراہم کی جانے والی خدمات میں تحفظ کے معیار، قابلِ اعتماد سروسز اور عوامی اعتماد کو مزید مضبوط بنانے کی ذمہ داری سنبھالیں گے۔ وہ کمپنی کے دونوں اہم پلیٹ فارمز محافِظ اور محسِن کے حوالے سے اعتماد، ساکھ اور متعلقہ فریقوں کے اطمینان کی نگرانی کریں گے۔
محافِظ (Mohafiz) پاکستان کی نجی شعبے میں کام کرنے والی ایمرجنسی رسپانس اور کرائسس مینجمنٹ سروس ہے، جو ہنگامی حالات میں فوری معاونت اور بحران سے نمٹنے کے لیے خدمات فراہم کرتی ہے۔ کمپنی کے مطابق محافِظ اب تک پاکستان سمیت مصر، ارجنٹائن اور کینیا میں 55 ہزار سے زائد سنگین ہنگامی حالات سے نمٹ چکا ہے اور 15 ہزار سے زائد انسانی جانیں بچانے میں کردار ادا کرچکا ہے۔ پلیٹ فارم کارپوریٹ اداروں کو جعلی اور غیر قانونی مصنوعات کے بڑھتے ہوئے مسئلے سے نمٹنے اور اپنے برانڈز کے تحفظ میں بھی معاونت فراہم کرتا ہے۔
مزیدپڑھیں:پاک، ترک، سعودیہ دفاعی معاہدے میں مصر بھی شامل ہونے کے قریب، ترک وزیر خارجہ
دوسری جانب محسِن (Mohsyn) بیرون ملک مقیم پاکستانیوں کے لیے ایک جامع خاندانی معاونت کی سروس ہے، جس کا مقصد انہیں پاکستان میں موجود اپنے خاندان، والدین، گھروں اور دیگر اہم معاملات کی حفاظت، دیکھ بھال اور انتظام میں مدد فراہم کرنا ہے۔ محسِن تربیت یافتہ، سکیورٹی ویٹڈ اور پیشہ ور سروس فراہم کنندگان کے ذریعے بیرون ملک مقیم پاکستانیوں کو یہ سہولت فراہم کرتا ہے کہ وہ فاصلے کے باوجود اپنے اہلخانہ اور املاک کی مناسب دیکھ بھال یقینی بنا سکیں۔ کمپنی کے مطابق محسِن اس بھائی کے کردار کی نمائندگی کرتا ہے جو بیرون ملک جانے کے بجائے پیچھے رہ کر خاندان کی ضروریات اور اہم معاملات کی دیکھ بھال کرتا ہے۔
چیف پبلک ٹرسٹ آفیسر کی حیثیت سے اپنی تقرری پر احمد محی الدین نے کہا کہ خدمت کا جذبہ وردی کے ساتھ ختم نہیں ہوتا۔ ان کے مطابق چاہے شہریوں کا تحفظ فرائض کی انجام دہی کے دوران کیا جائے یا فاصلے کے باوجود خاندانوں کو ایک دوسرے سے جڑے اور محفوظ رکھنے میں مدد دی جائے، بنیادی ذمہ داری ایک ہی ہے کہ لوگوں کے لیے ایسا شخص یا ادارہ بنا جائے جس پر وہ حقیقی معنوں میں اعتماد کرسکیں۔
انہوں نے کہا کہ ہیومنٹیک میں شمولیت کا فیصلہ اس لیے کیا کیونکہ کمپنی کا مشن ان اقدار سے مطابقت رکھتا ہے جو ان کی عوامی خدمت کے دوران ان کی رہنمائی کرتی رہی ہیں، جن میں دیانت داری، جواب دہی اور لوگوں کے لیے حقیقی احساسِ ذمہ داری شامل ہیں۔ انہوں نے محافِظ اور محسِن کے ساتھ کام کرنے اور ذاتی ساکھ کو پائیدار عوامی اعتماد میں تبدیل کرنے کے عمل میں کردار ادا کرنے کو اپنے لیے اعزاز قرار دیا۔
ہیومنٹیک کے بانی اور چیف ایگزیکٹو آفیسر فہد خان نے احمد محی الدین کی تقرری کا خیرمقدم کرتے ہوئے کہا کہ احمد ان اقدار کی نمائندگی کرتے ہیں جن پر کمپنی کے ادارے قائم کیے گئے ہیں۔ ان کے مطابق چیف پبلک ٹرسٹ آفیسر کی تقرری ایمرجنسی رسپانس اور خاندانی معاونت کی خدمات میں اعلیٰ ترین معیار، قابلِ اعتماد کارکردگی اور عوامی اعتماد کے حوالے سے کمپنی کے عزم کو مزید مضبوط کرے گی۔
احمد محی الدین کی پیشہ ورانہ قابلیت میں پاکستان نیوی میں خدمات کے بعد پاکستان پولیس سروس میں طویل کیریئر شامل ہے۔ وہ پاکستان نیول اکیڈمی، نیشنل پولیس اکیڈمی اور ایف بی آئی نیشنل اکیڈمی کوانٹیکو، ورجینیا سے تربیت اور گریجویشن حاصل کرچکے ہیں۔ اس کے علاوہ انہوں نے برطانیہ کی یونیورسٹی آف لیسٹر سے دہشت گردی، سکیورٹی اور پولیسنگ کے شعبے میں بھی تعلیم حاصل کی ہے۔
ان کی ہیومنٹیک میں تقرری ایسے وقت میں ہوئی ہے جب محافِظ اور محسِن دونوں اپنے دائرہ کار اور اثرات کو مزید وسعت دے رہے ہیں۔ محافِظ ملک گیر ایمرجنسی کوآرڈی نیشن، کارپوریٹ برانڈ پروٹیکشن اور غیر قانونی تجارت کے خلاف اقدامات پر توجہ مرکوز کیے ہوئے ہے، جبکہ محسِن بیرون ملک مقیم پاکستانی خاندانوں کو پاکستان میں اپنے پیاروں، والدین اور املاک کی دیکھ بھال کے لیے قابلِ اعتماد معاونت فراہم کرنے کے ساتھ ساتھ ان والدین کی مدد بھی کررہا ہے جو پاکستان میں باوقار انداز میں ریٹائرمنٹ گزارنے کے خواہش مند ہیں۔
