پیر 14 ستمبر 2026 
کرسٹیانو رونالڈو نے سعودی پرو لیگ کے میچ کے دوران روبن نیویس کو آنجہانی دیوگو ژوتا کے نام سے انتہائی نامناسب نعرے لگا کر نشانہ بنانے والے شائقین پر تاحیات پابندی کا مطالبہ کر دیا۔
ہفتے کے روز ہونے والے میچ میں ال ہلال کے خلاف کھیلتے ہوئے سابق وولورہمپٹن کھلاڑی روبن نیویس کو ال تعاؤن کے حامیوں کی جانب سے ’ژوتا! ژوتا! ژوتا!‘ کے نعرے سننے کو ملے۔
روبن نیویس، جو اپنے قریبی دوست دیوگو ژوتا کی آخری رسومات کے دوران ان کا تابوت اٹھانے والوں میں شامل تھے، شائقین کے اس رویے پر شدید غصے میں آگئے۔ انہوں نے اشارے سے کہا کہ خدا تمہیں دیکھ رہا ہے اور پھر طنزیہ انداز میں شائقین کے لیے تالیاں بجائیں۔
29 سالہ نیویس نے بعد میں مکسڈ زون سے گزرتے ہوئے کہا وہ امید کرتے ہیں کہ یہ لوگ بعد میں نماز پڑھنے نہ جائیں۔
اس واقعے پر سوشل میڈیا پر شدید غم و غصے کا اظہار کیا گیا اور اب النصر کے سپر اسٹار کرسٹیانو رونالڈو بھی ذمہ دار شائقین کے خلاف کارروائی کا مطالبہ کرنے والوں میں شامل ہوگئے ہیں۔
رونالڈو نے ایکشن کا مطالبہ کرنے والی انسٹاگرام پوسٹ پر تبصرہ کرتے ہوئے لکھا کہ لیگ کو اس قسم کے شائقین کے رویے کے خلاف کارروائی کرنی چاہیے اور انہیں سزا دینی چاہیے۔ یہ اب فٹبال نہیں رہی اور کچھ حدود ہونی چاہئیں۔
مزید پڑھیں:ای سی سی اجلاس: پیٹرول ریلیف اسکیم کیلئے 75 ارب روپے منظور
ان کا کہنا تھا کہ جو لوگ اس طرح کا رویہ اختیار کرتے ہیں، انہیں دوبارہ کبھی کسی اسٹیڈیم میں داخل ہونے کی اجازت نہیں دینی چاہیے۔
