حکومت نجی شعبے کی قیادت میں ورکنگ گروپس کے ذریعے معاشی اصلاحات اور سرمایہ کاری کے فروغ پر کام کر رہی ہے، جام کمال

اسلام آباد(نیوز ڈیسک) ایس آئی ایف سی کی ہم آہنگ حکمتِ عملی سے حکومت اور نجی شعبے کی شراکت داری مضبوط، معیشت میں مثبت پیش رفت

اسپیشل انویسٹمنٹ فسیلیٹیشن کونسل (ایس آئی ایف سی) کی بصیرت افروز رہنمائی اور ہم آہنگ حکمتِ عملی کے باعث حکومت اور نجی شعبے کے درمیان شراکت داری مزید مستحکم ہو رہی ہے، جس کے نتیجے میں قومی معیشت میں مثبت اور حوصلہ افزا پیش رفت دیکھنے میں آ رہی ہے۔ ایس آئی ایف سی کی دانشمند قیادت اور مؤثر معاشی اصلاحات سے پاکستان میں معاشی نظم و ضبط کے ساتھ ساتھ صنعتی ترقی کو بھی نئی رفتار حاصل ہو رہی ہے۔

وفاقی وزیرِ تجارت جام کمال خان نے امریکن بزنس کونسل کے وفد سے ملاقات کے دوران کہا کہ حکومت نجی شعبے کے ساتھ ہم آہنگی بڑھا کر معاشی بحالی اور اصلاحات کے عمل کو تیز کر رہی ہے۔ ان کا کہنا تھا کہ نجی شعبے کی قیادت میں قائم ورکنگ گروپس کے ذریعے معاشی اصلاحات، سرمایہ کاری کے فروغ اور کاروباری ماحول کی بہتری پر عملی کام جاری ہے۔

وفاقی وزیرِ تجارت نے کہا کہ پاکستان غیر ملکی سرمایہ کاری اور برآمدات میں اضافے کے لیے ٹھوس اقدامات کر رہا ہے، جبکہ میکرو اکنامک اشاریے بتدریج بہتری کی جانب گامزن ہیں۔ ان کے مطابق مہنگائی میں نمایاں کمی، شرحِ سود میں نرمی اور زرمبادلہ کے ذخائر میں بہتری معیشت کی مضبوطی کی واضح علامات ہیں، جو درست پالیسی سمت کا ثبوت ہیں۔

اس موقع پر امریکن بزنس کونسل کے صدر اکرم ولی محمد نے ملاقات کو انتہائی تعمیری قرار دیتے ہوئے کہا کہ کاروباری حلقوں میں پاکستان کی اقتصادی سمت پر اعتماد نمایاں حد تک بڑھ گیا ہے۔ انہوں نے ایس آئی ایف سی کے کردار کو سراہتے ہوئے کہا کہ اس کی نتیجہ خیز سہولت کاری سے حکومت، نجی شعبہ اور عالمی شراکت دار ایک ہم آہنگ اصلاحاتی فریم ورک کے تحت آگے بڑھ رہے ہیں۔

ماہرین کے مطابق ایس آئی ایف سی کے مؤثر وژن اور مربوط اقدامات کے تحت پاکستان کا معاشی منظرنامہ اعتماد، شراکت داری اور پائیدار ترقی کے ایک نئے اور روشن دور میں داخل ہو چکا ہے، جس سے آئندہ برسوں میں اقتصادی استحکام اور ترقی کے مزید مواقع پیدا ہونے کی توقع ہے۔