پیر 18 مئی 2026 
وزیرِ اعظم محمد شہباز شریف (Shahbaz Sharif) نے کہا ہے کہ حکومت ایسے ترقیاتی منصوبوں کو ترجیح دے گی جن کے نتائج واضح اور یقینی ہوں، تاکہ عوامی وسائل کا درست اور مؤثر استعمال ممکن بنایا جا سکے۔
ان کی زیر صدارت ہونے والے ایک اعلیٰ سطحی اجلاس میں رواں مالی سال کے ترقیاتی بجٹ اور آئندہ سال کے لیے مجوزہ منصوبوں کا تفصیلی جائزہ لیا گیا۔ اجلاس میں مختلف وزارتوں کی کارکردگی اور جاری منصوبوں پر پیش رفت بھی زیر غور آئی۔
وزیرِ اعظم نے کہا کہ بہتر کارکردگی دکھانے والی وزارتوں کو ترقیاتی منصوبوں کے لیے ترجیحی بنیادوں پر فنڈز فراہم کیے جائیں گے۔ ان کے مطابق حکومت کا مقصد یہ ہے کہ ہر روپے کا خرچ عوامی فائدے اور عملی نتائج سے جڑا ہو۔
مزید پڑھیں؛آئی ایم ایف کا بی آئی ایس پی وظیفے میں اضافہ کا مطالبہ
انہوں نے واضح کیا کہ پانی کے ذخائر میں اضافہ اور پن بجلی کے منصوبے ترقیاتی ترجیحات میں سرفہرست رہیں گے، کیونکہ یہ شعبے ملک کی طویل المدتی ضروریات کے لیے انتہائی اہم ہیں۔
شہباز شریف نے اجلاس میں پانڈا بانڈز کے کامیاب اجرا اور مارکیٹ میں ان کی پذیرائی پر وزیر خزانہ کی کارکردگی کو سراہا۔ اس کے ساتھ انہوں نے ریلوے، آئی ٹی اور پاور سیکٹر کی بہتری کے لیے کیے گئے اقدامات کی بھی تعریف کی۔
وزیرِ اعظم نے اس بات پر زور دیا کہ ترقیاتی منصوبوں میں پبلک پرائیویٹ پارٹنرشپ کو مزید فروغ دیا جائے تاکہ سرمایہ کاری میں اضافہ اور منصوبوں کی تکمیل میں تیزی لائی جا سکے۔
