منگل 9 جون 2026 
نیشنل الیکٹرک پاور ریگولیٹری اتھارٹی (Nepra) نے ملک بھر کے بجلی صارفین کے لیے ریلیف کا اعلان کرتے ہوئے بجلی کی قیمت میں کمی کا نوٹیفکیشن جاری کر دیا ہے۔
نوٹیفکیشن کے مطابق بجلی کی قیمت میں 1 روپے 99 پیسے فی یونٹ کمی کی گئی ہے۔ یہ کمی جنوری تا مارچ 2026 کی سہ ماہی ایڈجسٹمنٹ کی مد میں منظور کی گئی ہے۔
نیپرا کے مطابق اس فیصلے کا اطلاق جون سے اگست 2026 تک کے بجلی بلوں پر ہوگا، جس کے تحت ملک بھر کے صارفین کو براہ راست ریلیف فراہم کیا جائے گا۔ اس سہ ماہی ایڈجسٹمنٹ میں کے الیکٹرک کے صارفین بھی شامل ہوں گے، جس سے کراچی سمیت ملک بھر کے صارفین مستفید ہوں گے۔
نوٹیفکیشن میں مزید بتایا گیا ہے کہ اس کمی کے نتیجے میں صارفین کو مجموعی طور پر 67 ارب 17 کروڑ 30 لاکھ روپے کا ریلیف دیا جائے گا، جس سے آئندہ تین ماہ کے دوران بجلی کے بلوں میں واضح کمی متوقع ہے۔
مزیدپڑھیں:آئندہ مالی سال کا وفاقی بجٹ 12 جون کو پیش کیاجائے گا،عطا تارڑ
ذرائع کے مطابق یہ فیصلہ ایندھن کی قیمتوں، پیداواری لاگت اور دیگر مالیاتی عوامل کا جائزہ لینے کے بعد کیا گیا ہے، جس کا مقصد عوام کو بجلی کے بلوں میں کچھ حد تک ریلیف فراہم کرنا ہے۔
دوسری جانب ماہرین کا کہنا ہے کہ عالمی منڈی میں توانائی کی قیمتوں میں اتار چڑھاؤ کے باعث آئندہ مہینوں میں بھی بجلی کے نرخ متاثر ہو سکتے ہیں۔
