پیر 20 جولائی 2026 
لندن: اینڈی برنہم نے سابق وزیر اعظم کیئر اسٹارمر کے مستعفی ہونے کے بعد برطانیہ کے 59ویں وزیر اعظم کے طور پر عہدہ سنبھال لیا۔
برطانوی میڈیا رپورٹس کے مطابق اینڈی برنہم نے بکنگھم پیلس میں بادشاہ چارلس سے ملاقات کی، جہاں انہوں نے حکومت تشکیل دینے کی دعوت قبول کی۔ اس کے بعد وہ باضابطہ طور پر برطانیہ کے نئے وزیر اعظم بن گئے۔
رپورٹس کے مطابق اینڈی برنہم کو فرسٹ لارڈ آف دی ٹریژری بھی مقرر کیا گیا ہے، جو برطانوی وزیر اعظم کا روایتی سرکاری عہدہ ہے۔
سیاسی مبصرین کا کہنا ہے کہ نئے وزیر اعظم سے توقع کی جا رہی ہے کہ وہ حکومت کو زیادہ مستحکم، مؤثر اور ذمہ دارانہ انداز میں چلائیں گے، جبکہ گزشتہ چند برسوں کے سیاسی انتشار اور معاشی غیر یقینی کے بعد ملک میں عوامی اعتماد کی بحالی کے لیے اقدامات کریں گے۔
عہدہ سنبھالنے کے بعد اینڈی برنہم 10 ڈاؤننگ اسٹریٹ پہنچے، جہاں انہوں نے اپنے پہلے خطاب میں محنت کش طبقے کے مسائل کو ترجیح دینے اور عوام کی زندگی میں بہتری لانے کے عزم کا اظہار کیا۔
انہوں نے کہا کہ یہ ان کے لیے ایک تاریخی لمحہ ہے اور ان کی حکومت ملکی سیاست میں اصلاحات کے لیے کام کرے گی، جن کے ثمرات صرف چند علاقوں تک محدود نہیں رہیں گے بلکہ پورے برطانیہ کو فائدہ پہنچے گا۔
اینڈی برنہم نے کہا کہ حکومت ملک کو ایک نیا معاشی ماڈل فراہم کرے گی اور دنیا کو دکھائے گی کہ برطانیہ دوبارہ استحکام کی راہ پر گامزن ہو سکتا ہے۔
انہوں نے مزید کہا کہ تعلیمی نظام میں اصلاحات کے ذریعے نوجوانوں کے لیے بہتر مواقع پیدا کیے جائیں گے، جبکہ مہنگائی سے متاثرہ عوام کو ریلیف دینے کے لیے آئندہ روز سے اقدامات کا اعلان کیا جائے گا۔
