پٹرولیم مصنوعات کی قیمتوں میں ایک بار پھر اضافہ، حکومت نے نیا نوٹیفکیشن جاری کر دیا

اسلام آباد: وفاقی حکومت نے پٹرولیم مصنوعات کی قیمتوں میں ایک بار پھر اضافہ کرتے ہوئے نئی قیمتوں کا باضابطہ نوٹیفکیشن جاری کر دیا۔ وزارتِ توانائی کی جانب سے جاری اعلامیے کے مطابق پیٹرول اور ہائی اسپیڈ ڈیزل کی قیمتوں میں اضافے کا اطلاق فوری طور پر کر دیا گیا ہے۔

نوٹیفکیشن کے مطابق پیٹرول کی فی لیٹر قیمت میں 3 روپے 66 پیسے اضافہ کیا گیا ہے، جس کے بعد نئی قیمت 335 روپے 18پیسے فی لیٹر مقرر کر دی گئی ہے۔ اسی طرح ہائی اسپیڈ ڈیزل کی فی لیٹر قیمت میں 4 روپے 80 پیسے اضافہ کیا گیا ہے، جس کے بعد ڈیزل کی نئی قیمت 383 روپے 46 پیسے فی لیٹر ہو گئی ہے۔

حکومتی فیصلے کے بعد پٹرولیم مصنوعات کی نئی قیمتوں کا اطلاق فوری طور پر نافذ العمل ہو گیا ہے۔ ماہرین کے مطابق ایندھن کی قیمتوں میں اضافے کے باعث ٹرانسپورٹ، اشیائے خور و نوش اور دیگر ضروری اشیاء کی قیمتوں پر بھی اثرات مرتب ہونے کا امکان ہے، جس سے مہنگائی کے دباؤ میں مزید اضافہ ہو سکتا ہے۔

اقتصادی ماہرین کا کہنا ہے کہ پٹرولیم مصنوعات کی قیمتوں میں ردوبدل کا انحصار عالمی منڈی میں خام تیل کی قیمتوں، درآمدی اخراجات اور روپے کی قدر پر ہوتا ہے۔ حالیہ اضافے کے بعد عوامی اور کاروباری حلقوں میں تشویش پائی جا رہی ہے، جبکہ ٹرانسپورٹرز اور مختلف شعبوں سے وابستہ افراد نے بھی بڑھتی ہوئی لاگت پر خدشات کا اظہار کیا ہے۔

دوسری جانب حکومت کا مؤقف ہے کہ پٹرولیم مصنوعات کی قیمتوں کا تعین بین الاقوامی مارکیٹ کے رجحانات اور متعلقہ معاشی عوامل کو مدنظر رکھتے ہوئے کیا جاتا ہے تاکہ سپلائی کا نظام برقرار رہے اور توانائی کے شعبے میں استحکام یقینی بنایا جا سکے۔

نئی قیمتوں کے نفاذ کے بعد عوام کو پیٹرول اور ڈیزل دونوں کی خریداری پر پہلے کے مقابلے میں زیادہ ادائیگی کرنا ہوگی، جبکہ آئندہ قیمتوں کا جائزہ عالمی منڈی کی صورتحال کے مطابق مقررہ مدت پر لیا جائے گا۔