مومنہ اقبال تنازع کے بعد ثاقب چدھڑ پھر خبروں میں، مبینہ پیغامات نے سوشل میڈیا پر بحث چھیڑ دی

لاہور: پاکستان مسلم لیگ (ن) سے تعلق رکھنے والے رکن پنجاب اسمبلی ثاقب چدھڑ اداکارہ مومنہ اقبال کے ساتھ تنازع کے بعد ایک بار پھر خبروں کی زینت بن گئے ہیں۔ اداکارہ کی جانب سے ہراسانی کے الزامات اور ثاقب چدھڑ کی جانب سے کیے گئے جوابی دعوؤں کے بعد معاملہ عدالت میں زیر سماعت ہے۔

اس دوران سوشل میڈیا پر گردش کرنے والے مبینہ اسکرین شاٹس نے ایک نئی بحث کو جنم دے دیا ہے۔ مشہور سوشل میڈیا چینل اسٹریم پاکستان نے دعویٰ کیا ہے کہ ثاقب چدھڑ نے صرف مومنہ اقبال ہی نہیں بلکہ شوبز انڈسٹری سے تعلق رکھنے والی دیگر اداکاراؤں سے بھی رابطے کی کوشش کی۔

چینل کے مطابق ثاقب چدھڑ نے اداکارہ سیدہ طوبیٰ انور کو انسٹاگرام پر پیغامات بھیجے اور انہیں آئی فون تحفے میں دینے کی پیشکش بھی کی۔ تاہم ان دعوؤں کی آزادانہ طور پر تصدیق نہیں ہوسکی۔

دوسری جانب اداکارہ اروبا مرزا نے بھی اپنی انسٹاگرام اسٹوری پر مبینہ ڈائریکٹ میسجز کا اسکرین شاٹ شیئر کیا، جس میں ایک اکاؤنٹ کی جانب سے بار بار “ہیلو” کے پیغامات بھیجے جانے کا دعویٰ کیا گیا ہے۔

مزید پڑھیں: مومنہ اقبال کیس، تفتیش مکمل، ایم پی اے ثاقب چدھڑ قصور وار قرار

مبینہ پیغامات سامنے آنے کے بعد سوشل میڈیا صارفین کی جانب سے مختلف ردعمل سامنے آ رہا ہے، جہاں کچھ صارفین نے تنقید کی جبکہ بعض نے معاملے کی مکمل تحقیقات کا مطالبہ کیا۔

واضح رہے کہ سوشل میڈیا پر گردش کرنے والے اسکرین شاٹس اور ان سے متعلق دعوؤں کی آزادانہ تصدیق نہیں ہوسکی۔ ثاقب چدھڑ نے ان تازہ الزامات پر تاحال کوئی باضابطہ عوامی مؤقف جاری نہیں کیا۔ عدالت میں زیر سماعت معاملے کے حتمی حقائق قانونی کارروائی مکمل ہونے کے بعد ہی واضح ہوں گے۔