بھارت: شوہر موٹرسائیکل پارک کرتا رہ گیا، نئی نویلی دلہن دوست کے ساتھ بھاگ گئی

بھارت میں شوہر موٹر سائیکل پارک کرتا رہ گیا اور نئی نویلی دلہن(Bride) مبینہ طور پر دوست کے ساتھ بھاگ گئی۔

بھارتی ریاست مدھیہ پردیش کے شہر گوالیار میں ایک نوجوان اس وقت پریشانی میں مبتلا ہوگیا جب وہ اپنی نئی نویلی دلہن کو چڑیا گھر کے داخلی دروازے پر چھوڑ کر موٹر سائیکل پارک کرنے گیا، لیکن واپس آیا تو اہلیہ وہاں موجود نہیں تھی۔ شوہر نے الزام عائد کیا ہے کہ اس کی 18 سالہ بیوی مبینہ طور پر ایک دوسرے شخص کے ساتھ موٹر سائیکل پر روانہ ہوگئی۔ واقعے کی سی سی ٹی وی فوٹیج بھی سامنے آئی ہے، جس کا جائزہ لے کر پولیس معاملے کی تحقیقات کررہی ہے۔

بھارتی میڈیا رپورٹس کے مطابق یہ واقعہ منگل کے روز پیش آیا، جب ضلع شیوپوری کے علاقے ناروَر سے تعلق رکھنے والا 21 سالہ نوجوان اپنی 18 سالہ اہلیہ کے ہمراہ گوالیار پہنچا تھا۔ دونوں نے چڑیا گھر کی سیر کے علاوہ اپنے رشتہ داروں سے ملاقات کا بھی منصوبہ بنایا تھا۔

#WATCH | 18-YO Newly Married Woman Flees With Lover After Husband Asks Her To Wait At Zoo Gate In Gwalior #MPnews #MadhyaPradesh pic.twitter.com/hREbop3VaG

— Free Press Madhya Pradesh (@FreePressMP) October 7, 2026

رپورٹس کے مطابق چڑیا گھر پہنچنے پر شوہر نے اپنی اہلیہ کو داخلی دروازے کے قریب انتظار کرنے کا کہا اور خود موٹر سائیکل پارک کرنے چلا گیا۔ چند منٹ بعد جب وہ واپس آیا تو خاتون وہاں موجود نہیں تھی۔ اس نے آس پاس تلاش کیا، تاہم بیوی کا کوئی سراغ نہ مل سکا۔ بعد ازاں اسے مبینہ طور پر معلوم ہوا کہ اس کی اہلیہ ایک دوسرے شخص کے ساتھ موٹر سائیکل پر وہاں سے روانہ ہوگئی ہے۔

میڈیا رپورٹس میں بتایا گیا ہے کہ سی سی ٹی وی فوٹیج میں ایک خاتون کو ایک شخص کے ساتھ موٹر سائیکل پر جاتے ہوئے دیکھا جاسکتا ہے۔

بعض اطلاعات کے مطابق یہ واقعہ تقریباً 26 سیکنڈ میں پیش آیا، تاہم خاتون کے وہاں سے جانے کے اصل حالات اور اس میں ملوث افراد کے کردار کا تعین پولیس کی تحقیقات کے بعد ہی ہوسکے گا۔

مزید پڑھیں:آئی ایم ایف کا پیٹرول سبسڈی محدود کرنے اور توانائی اصلاحات پر زور

اہلیہ کی تلاش میں ناکامی کے بعد نوجوان اپنے چچا کے ہمراہ پڑاؤ پولیس اسٹیشن پہنچا اور شکایت درج کرائی۔ شوہر نے اپنی شکایت میں ارمان خان نامی شخص کو نامزد کرتے ہوئے الزام لگایا کہ وہ اس کی اہلیہ کو بہلا پھسلا کر اپنے ساتھ لے گیا ہے۔ اس نے خدشہ ظاہر کیا کہ خاتون کو کسی نامعلوم مقام پر لے جایا گیا ہے۔

پولیس حکام کے مطابق چڑیا گھر اور اس کے اطراف کی سی سی ٹی وی فوٹیج کا جائزہ لیا جارہا ہے تاکہ یہ معلوم کیا جاسکے کہ خاتون کس شخص کے ساتھ گئی اور موٹر سائیکل کس سمت روانہ ہوئی۔ پولیس مبینہ طور پر موبائل فون کی لوکیشن سے بھی خاتون اور نامزد شخص کا سراغ لگانے کی کوشش کررہی ہے۔

پولیس کا کہنا ہے کہ خاتون کی بازیابی اور اس کا بیان ریکارڈ کیے جانے کے بعد ہی صورت حال واضح ہوسکے گی کہ وہ اپنی مرضی سے گئی تھی یا اسے کسی نے بہلا پھسلا کر ساتھ لے جانے کی کوشش کی۔ فی الحال شوہر کی جانب سے عائد کیے گئے الزامات کی آزادانہ تصدیق نہیں ہوئی اور معاملے کی مزید تفتیش جاری ہے۔