ٹیرر فنانسنگ کیخلاف اداروں کی استعداد میں اضافہ ناگزیر ہے، بیرسٹر عقیل

اسلام آباد:(نیوزڈیسک)وزیر مملکت برائے قانون بیرسٹر عقیل ملک نے کہا ہے کہ دہشت گردی کے خاتمے کے لیے پارلیمانی نگرانی کو مؤثر بنانا اوردہشت گردوں کی مالی معاونت روکنے کے لیے اداروں کی استعداد کار میں اضافہ ناگزیر ہے۔

پاکستان میں دہشت گردی کے خلاف ادارہ جاتی صلاحیتوں کو بڑھانے” کے موضوع پراسلام آباد میں منعقدہ دو روزہ قومی مکالمے کی اختتامی تقریب سے خطاب کر تے ہوئے انہوں نے کہا کہ پاکستان نے دہشت گردی کے خلاف جنگ میں بے پناہ قربانیاں دی ہیں اور ملک سے دہشت گردی کو جڑ سے اکھاڑنے کے لیے پرعزم ہے۔

انہوں نے کہا کہ دہشت گردی کی فنڈنگ روکنے کے حوالے سے متعدد مؤثر اقدامات اور قانونی اصلاحات کی گئی ہیں جنہیں عالمی سطح پر سراہا گیا ہے۔ دہشت گردوں کے مالی نیٹ ورکس کو توڑنے کے لیے سخت ترین عالمی معیارات اپنائے گئے ہیں اور ٹیرر فنانسنگ کے خلاف کامیابیاں ریاست کے مضبوط عزم اور اداروں کی انتھک محنت کا نتیجہ ہیں۔

بیرسٹر عقیل ملک نے کہا کہ دہشت گردی کے خلاف جنگ میں تمام سیاسی جماعتیں متحد ہیں اور پارلیمنٹ اس قومی مقصد کے لیے ایک پیج پر ہے۔ انسدادِ دہشت گردی اور مالی معاونت کی روک تھام میں پاکستان کا کردار خطے میں نمایاں ہے۔