پیر 17 اگست 2026 
عالمی شہرت یافتہ پرتگالی فٹبالر کرسٹیانو رونالڈو(Christiano Ronaldo) اور ان کی دیرینہ ساتھی جارجینا روڈریگز نے 11 اگست کو پرتگال کے شہر کاسکائس میں واقع اپنے گھر میں انتہائی نجی اور سادہ تقریب میں شادی کرلی جس کی پہلی تصاویر معروف فیشن میگزین ووگ نے جاری کردی ہیں۔
رونالڈو اور جارجینا نے روایتی اور پرتعیش شادی کے بجائے اپنے گھر کے ڈرائنگ روم میں شادی کے عہد کیے جہاں ان کے پانچ بچے بھی موجود تھے۔ جارجینا کے مطابق گھر کا انتخاب اس لیے کیا گیا کیونکہ یہی وہ جگہ ہے جہاں خاندان روزمرہ زندگی کے اہم لمحات ایک ساتھ گزارتا ہے۔
View this post on Instagram
ووگ سے گفتگو میں جارجینا نے کہا کہ وہ چاہتی تھیں کہ کئی برس بعد ان کے بچے اس میز کو یاد کریں جہاں ان کے والدین نے ایک دوسرے سے شادی کے عہد کیے تھے۔
مزیدپڑھیں:سعودی عرب کا عمرہ ویزا کے لیے نئے قوانین کا اعلان
رپورٹس کے مطابق جوڑے نے شادی کی تقریب کو جان بوجھ کر انتہائی محدود رکھا، تاہم دونوں مستقبل میں اپنے خاندان اور دوستوں کے ساتھ ایک بڑی تقریب منعقد کرنے کا ارادہ رکھتے ہیں۔ یہ شادی ان کی پہلی ملاقات کے 10 سال مکمل ہونے کے موقع پر ہوئی۔ دونوں کی پہلی ملاقات میڈرڈ کے ایک گوچی اسٹور میں ہوئی تھی، جہاں جارجینا ملازمت کرتی تھیں۔
View this post on Instagram
رونالڈو نے شادی کے بعد سوشل میڈیا پر شادی کی انگوٹھیوں کی تصویر بھی شیئر کی تھی، جس کے ساتھ مختصر پیغام ’’C ❤️ G‘‘ درج تھا۔
دوسری جانب شادی کے موقع پر رونالڈو نے اپنے فٹبال کیریئر کے اختتام کا بھی عندیہ دیا ہے۔ 41 سالہ فٹبالر نے ووگ کو دیے گئے انٹرویو میں کہا کہ آئندہ سیزن ممکنہ طور پر ان کے پیشہ ورانہ فٹبال کیریئر کا آخری سال ہوسکتا ہے۔ انہوں نے کہا کہ وہ کھیل سے ایک ’شاندار ورثہ‘ چھوڑنا چاہتے ہیں۔
رونالڈو کے مطابق انہوں نے فٹبال کے بعد کی زندگی کے لیے بھی منصوبہ بندی شروع کردی ہے جس میں خاندان کے ساتھ زیادہ وقت گزارنا، سفر کرنا اور پیڈل کھیلنا شامل ہے۔
کرسٹیانو رونالڈو نے اپنے 25 سالہ شاندار کیریئر کے دوران اسپورٹنگ، مانچسٹر یونائیٹڈ، ریئل میڈرڈ، یووینٹس اور النصر کی نمائندگی کی اور فٹبال کی تاریخ کے کامیاب ترین کھلاڑیوں میں اپنا نام درج کرایا۔
رونالڈو اور جارجینا کے خاندان میں پانچ بچے شامل ہیں جبکہ دونوں اپنے خاندان کو اپنی زندگی کی سب سے اہم ترجیح قرار دیتے ہیں۔ شادی کی حالیہ تقریب میں بھی یہی خاندانی پہلو نمایاں رہا جسے جوڑے نے ایک بڑی اور پرتعیش تقریب کے بجائے ایک یادگار اور ذاتی لمحے کے طور پر منانے کا فیصلہ کیا۔
