جمعرات 16 اپریل 2026 
واشنگٹن ،وفاقی وزیرِ خزانہ محمد اورنگزیب نے غیر ملکی میڈیا ادارےفوکس نیوز کو دیے گئے ایک خصوصی انٹرویو میں پاکستان کی معاشی صورتحال پر تفصیلی گفتگو(detail discussion) کرتے ہوئے کہا ہے کہ ملکی معیشت اب استحکام کی جانب تیزی سے گامزن ہے۔
انہوں نے واضح کیا کہ حکومت کی جانب سے کیے گئے مشکل اور سخت فیصلوں کے نتیجے میں نہ صرف مہنگائی کی شرح میں کمی آئی ہے بلکہ عالمی مالیاتی اداروں اور غیر ملکی سرمایہ کاروں کا پاکستان پر اعتماد بھی بحال ہوا ہے۔
وزیرِ خزانہ کا کہنا تھا کہ موجودہ مالیاتی پالیسیوں کا مقصد طویل مدتی معاشی ترقی کو یقینی بنانا ہے تاکہ ملک کو بار بار آنے والے مالیاتی بحرانوں سے مستقل نجات دلائی جا سکے۔محمد اورنگزیب نے انٹرویو کے دوران اسٹاک مارکیٹ میں حالیہ ریکارڈ ساز تیزی کا تذکرہ کرتے ہوئے اسے سرمایہ کاروں کے اعتماد کی عکاسی قرار دیا۔ انہوں نے کہا کہ زرِ مبادلہ کے ذخائر میں بہتری اور کرنسی کی قدر میں استحکام اس بات کا ثبوت ہے کہ حکومت کی معاشی اصلاحات کا ایجنڈا کامیابی سے کام کر رہا ہے۔
ان کا مزید کہنا تھا کہ حکومت اب ٹیکس نیٹ کو بڑھانے اور سرکاری اداروں کی نجکاری کے عمل کو تیز کرنے پر توجہ مرکوز کر رہی ہے تاکہ ملکی خزانے پر پڑنے والا بوجھ کم کیا جا سکے اور نجی شعبے کی حوصلہ افزائی ہو سکے۔وفاقی وزیرِ خزانہ نے عالمی سطح پر پاکستان کے معاشی امیج کو بہتر بنانے کے عزم کا اعادہ کرتے ہوئے کہا کہ پاکستان میں توانائی کے شعبے میں اصلاحات اور ڈیجیٹلائزیشن کے عمل کو ترجیح دی جا رہی ہے۔
مزید پڑھیں:عوام کو زیادہ سے زیادہ سہولیات کی فراہمی ترجیح ہے، بلاول بھٹو زرداری
انہوں نے عالمی برادری کو پیغام دیا کہ پاکستان اب ایک ابھرتی ہوئی معیشت کے طور پر سرمایہ کاری کے لیے بہترین ملک بن چکا ہے جہاں شفافیت اور کاروباری سہولتوں کی فراہمی کو یقینی بنایا جا رہا ہے۔ وزیرِ خزانہ نے امید ظاہر کی کہ جاری اصلاحات کے نتیجے میں عام آدمی کی زندگی میں بھی جلد بہتری آئے گی اور ملک ایک پائیدار خوشحالی کی جانب بڑھے گا۔
