منگل 12 مئی 2026 
صدرِ پاکستان آصف علی زرداری نے جنڈ اور خوشحال گڑھ پل، Kohat کے قریب دہشت گردی کا بڑا خطرہ ناکام بنانے کے دوران جان قربان کرنے والے بہادر شہری لیاقت کو خراجِ تحسین پیش کیا ہے۔
صدرِ مملکت نے اپنے بیان میں کہا کہ شہید لیاقت جیسے بہادر شہری دہشت گردی کے خلاف قومی استقامت، حب الوطنی اور اجتماعی شعور کی روشن مثال ہیں۔ انہوں نے کہا کہ ایسے افراد کی قربانیاں قوم ہمیشہ یاد رکھے گی۔
صدر زرداری نے کہا کہ دہشت گردی کے ناسور کے خاتمے کیلئے پوری قوم اپنی سیکیورٹی فورسز اور قانون نافذ کرنے والے اداروں کے ساتھ متحد کھڑی ہے اور ملک دشمن عناصر کے مذموم عزائم کبھی کامیاب نہیں ہونے دیے جائیں گے۔
مزیدپڑھیں:وزیراعظم کا خوشحال گڑھ پل پر دہشتگردی ناکام بنانے والے شہید لیاقت کو خراج تحسین
انہوں نے اس عزم کا اظہار کیا کہ بیرونی مداخلت کے باعث ہونے والی دہشت گردی کے خلاف جنگ جاری رہے گی اور پاکستان دشمن عناصر کو شکست دی جائے گی۔
صدرِ مملکت نے سردار سلیم حیدر خان اور محسن نقوی کو ہدایت کی کہ شہید لیاقت کے اہلِ خانہ کا سراغ لگا کر اُن تک پوری قوم کی جانب سے یکجہتی، تعزیت اور خراجِ عقیدت کا پیغام پہنچایا جائے۔
