جمعرات 14 مئی 2026 
تلنگانہ میں جیل انتظامیہ نے ایک منفرد پروگرام متعارف کرا دیا ہے جس کے تحت عام شہری مقررہ فیس ادا کر کے جیل کی زندگی کا عملی تجربہ حاصل کر سکیں گے۔
بھارتی میڈیا رپورٹس کے مطابق حیدرآباد میں واقع چنچل گوڑا سینٹرل جیل کی انتظامیہ نے یہ اقدام ان افراد کے لیے شروع کیا ہے جو جیل کے ماحول اور وہاں کے نظم و ضبط کو قریب سے دیکھنے میں دلچسپی رکھتے ہیں۔
12 اور 24 گھنٹے جیل میں گزارنے کی سہولت
رپورٹ کے مطابق جیل میں 24 گھنٹے گزارنے کے خواہش مند افراد کو 2000 بھارتی روپے فیس ادا کرنا ہوگی، جبکہ 12 گھنٹے کے تجربے کے لیے ایک ہزار بھارتی روپے مقرر کیے گئے ہیں۔
مزیدپڑھیں:حکومت کاروباری سرگرمیاں بڑھانے اور برآمدات کے فروغ پر توجہ دے رہی ہے، احسن اقبال
اس دوران شرکاء کو قیدیوں جیسا ماحول، معمولات زندگی اور جیل کے قواعد و ضوابط کا تجربہ کروایا جائے گا تاکہ وہ جیل کے نظام کو بہتر انداز میں سمجھ سکیں۔
نوجوانوں میں قانون سے آگاہی مقصد قرار
جیل حکام کے مطابق اس پروگرام کا مقصد خاص طور پر نوجوانوں میں قانون، نظم و ضبط اور جیل کے نظام کے حوالے سے شعور بیدار کرنا ہے۔
انتظامیہ کا کہنا ہے کہ اس اقدام سے لوگوں کو یہ سمجھنے میں مدد ملے گی کہ جرم اور قانون شکنی کے نتائج کس قدر سخت ہو سکتے ہیں۔
سوشل میڈیا پر دلچسپ بحث
اس منفرد پروگرام کے اعلان کے بعد سوشل میڈیا پر بھی دلچسپ بحث شروع ہو گئی ہے۔ کچھ صارفین نے اسے آگاہی کے لیے اچھا قدم قرار دیا جبکہ بعض افراد نے اس منصوبے کو غیر معمولی اور حیران کن قرار دیا ہے۔
ماہرین کے مطابق دنیا کے مختلف ممالک میں اس نوعیت کے تجرباتی پروگرام پہلے بھی متعارف کروائے جا چکے ہیں تاکہ عوام کو جیل نظام اور قانون کی اہمیت سے روشناس کرایا جا سکے۔
