اتوار 7 جون 2026 
چینی شوبز انڈسٹری کے معروف نوجوان اداکار اور ماڈل جِن زے 33 برس کی عمر میں اچانک انتقال کر گئے، جس کے بعد چین سمیت دنیا بھر میں ان کے مداحوں اور شوبز شخصیات میں سوگ کی فضا قائم ہو گئی۔
جِن زے کی وفات کی تصدیق ان کی ٹیلنٹ مینجمنٹ ایجنسی نے ایک باضابطہ بیان کے ذریعے کی، تاہم موت کی وجوہات کے بارے میں تفصیلات جاری نہیں کی گئیں۔
غیر ملکی میڈیا رپورٹس کے مطابق جِن زے، جن کا اصل نام ژانگ جیاوئی تھا، چین کے شہر ہانگژو میں واقع اپنی رہائش گاہ پر انتقال کر گئے۔ ان کی اچانک وفات کی خبر سامنے آنے کے بعد سوشل میڈیا پر تعزیتی پیغامات کا سلسلہ شروع ہو گیا اور چند ہی گھنٹوں میں ان کا نام مختلف پلیٹ فارمز پر ٹاپ ٹرینڈ بن گیا۔
اداکار کی نمائندہ ایجنسی نے اپنے بیان میں کہا کہ جِن زے کے اہل خانہ کی خواہش اور رازداری کے احترام کے پیش نظر ان کی وفات کی وجوہات فی الحال منظر عام پر نہیں لائی جا رہیں۔ ایجنسی نے میڈیا، مداحوں اور سوشل میڈیا صارفین سے اپیل کی کہ وہ اس مشکل وقت میں خاندان کی نجی زندگی کا احترام کریں اور غیر مصدقہ خبروں، افواہوں یا قیاس آرائیوں کے پھیلاؤ سے گریز کریں۔
مزیدپڑھیں:حکومت نے مظفر آباد میں دفعہ 144 نافذ کر دی
بیان میں مزید کہا گیا کہ خاندان اس وقت شدید صدمے سے دوچار ہے اور وہ سکون کے ساتھ آخری رسومات کی ادائیگی کرنا چاہتا ہے، اس لیے عوام اور میڈیا ذمہ داری کا مظاہرہ کریں۔
جِن زے چینی ڈرامہ اور ماڈلنگ انڈسٹری کا ایک نمایاں نام تھے۔ انہوں نے اپنی محنت، اداکاری کی صلاحیت اور خوش اخلاقی کی بدولت مختصر عرصے میں لاکھوں مداحوں کے دل جیتے۔ ساتھی فنکاروں اور شوبز شخصیات نے انہیں ایک باصلاحیت، عاجز، محنتی اور مثبت سوچ رکھنے والا انسان قرار دیتے ہوئے ان کی وفات کو انڈسٹری کے لیے بڑا نقصان قرار دیا ہے۔
دلچسپ بات یہ ہے کہ اپنی وفات سے محض ایک ماہ قبل جِن زے نے چینی سوشل میڈیا پلیٹ فارم ویبو پر اپنی آخری پوسٹ شیئر کی تھی، جس میں انہوں نے اپنے نئے ڈرامائی منصوبے کی شوٹنگ مکمل ہونے پر خوشی اور اطمینان کا اظہار کیا تھا۔ اس منصوبے میں وہ مرکزی کردار ادا کر رہے تھے اور مداح اس ڈرامے کی ریلیز کا بے صبری سے انتظار کر رہے تھے۔
ان کی آخری سوشل میڈیا پوسٹ اب مداحوں کے لیے ایک جذباتی یادگار بن چکی ہے، جہاں ہزاروں افراد تعزیتی پیغامات اور خراجِ عقیدت پیش کر رہے ہیں۔ جِن زے کی اچانک وفات نے ان کے چاہنے والوں کو گہرے صدمے سے دوچار کر دیا ہے اور شوبز حلقے ان کی یادوں اور فنی خدمات کو خراجِ تحسین پیش کر رہے ہیں۔
