عالمی منڈی میں سونے کی قیمت میں اضافہ

امریکا (United States)اور ایران(Iran) کے درمیان عبوری امن معاہدے کے اعلان کے بعد عالمی مالیاتی منڈیوں میں نمایاں تبدیلیاں دیکھنے میں آئی ہیں۔ مشرقِ وسطیٰ میں کشیدگی کم ہونے اور جنگ بندی میں توسیع کی خبر کے بعد خام تیل کی قیمتوں میں کمی ریکارڈ کی گئی، جبکہ سرمایہ کاروں نے محفوظ سرمایہ کاری کے طور پر دوبارہ سونے کا رخ کیا جس کے باعث عالمی منڈی میں سونے کی قیمت ایک فیصد سے زائد بڑھ گئی۔

بین الاقوامی مارکیٹ میں اسپاٹ گولڈ (Spot Gold)کی قیمت 1.4 فیصد اضافے کے بعد 4,316 ڈالر فی اونس تک پہنچ گئی۔ گزشتہ روز سونے کی قیمت میں نمایاں کمی دیکھی گئی تھی، تاہم تازہ پیش رفت کے بعد قیمتی دھات نے دوبارہ تیزی اختیار کر لی۔ دوسری جانب امریکی گولڈ فیوچرز میں معمولی کمی ریکارڈ کی گئی۔

ماہرین معاشیات کے مطابق ایران اور امریکا کے درمیان مثبت سفارتی پیش رفت اور جنگ بندی کے باعث تیل کی قیمتوں میں کمی واقع ہوئی، جس سے عالمی سطح پر مہنگائی کے خدشات کم ہوئے۔ افراطِ زر میں کمی کے امکانات پیدا ہونے پر سرمایہ کاروں نے سونے میں سرمایہ کاری بڑھا دی، جس سے اس کی قیمتوں کو سہارا ملا۔

رپورٹس کے مطابق امریکی صدر ڈونلڈ ٹرمپ کی جانب سے ایران کے ساتھ معاہدے کی بعض شرائط پر سخت مؤقف اختیار کرنے کے باوجود دونوں ممالک نے 14 نکاتی عبوری معاہدے پر اتفاق کیا ہے۔ معاہدے کے تحت موجودہ جنگ بندی میں مزید 60 روز کی توسیع کر دی گئی ہے تاکہ مستقل امن معاہدے کے لیے مذاکرات کا عمل جاری رکھا جا سکے۔

مالیاتی ماہرین کا کہنا ہے کہ اگرچہ تیل کی قیمتوں میں کمی سونے کے لیے مثبت ثابت ہوئی ہے، تاہم مستقبل میں امریکی شرح سود میں اضافے کی صورت میں سونے کی قیمتوں میں مزید تیزی محدود ہو سکتی ہے، کیونکہ سونا سود یا منافع فراہم کرنے والا اثاثہ نہیں ہے۔

مزیدپڑھیں:اے ڈی بی نے پاکستان کے لیے 70 کروڑ ڈالر قرض کی منظوری دے دی

ادھر امریکی مرکزی بینک فیڈرل ریزرو کے پالیسی سازوں کی اکثریت رواں سال شرح سود میں اضافے کے حق میں دکھائی دیتی ہے۔ مارکیٹ تجزیہ کاروں کے مطابق دسمبر میں شرح سود بڑھائے جانے کے امکانات 85 فیصد تک پہنچ چکے ہیں، جس پر سرمایہ کاروں کی نظریں مرکوز ہیں۔

دوسری قیمتی دھاتوں کی قیمتوں میں بھی اضافہ ریکارڈ کیا گیا۔ عالمی منڈی میں چاندی کی قیمت 1.8 فیصد اضافے کے بعد 69.18 ڈالر فی اونس ہو گئی، جبکہ پلاٹینم 1.2 فیصد اضافے کے ساتھ 1,757 ڈالر فی اونس تک پہنچ گیا۔ اسی طرح پیلیڈیم کی قیمت بھی 1.3 فیصد بڑھ کر 1,329 ڈالر فی اونس ریکارڈ کی گئی۔

ماہرین کے مطابق مشرقِ وسطیٰ میں حالات کے مزید مستحکم ہونے اور امریکا کی آئندہ مالیاتی پالیسیوں کے فیصلے عالمی منڈی میں سونے، تیل اور دیگر قیمتی دھاتوں کی قیمتوں کے تعین میں اہم کردار ادا کریں گے۔