چار سدہ اور ہزارہ موٹر وے ٹریفک کیلئے بند! پولیس کی ہنگامی ٹریفک ایڈوائزری جاری

موٹروے پولیس(Motorway Police) نے مختلف شاہراہوں پر سفر کرنے والے شہریوں کے لیے اہم ٹریفک ایڈوائزری جاری کرتے ہوئے بعض مقامات پر مسافر بردار گاڑیوں کے داخلے پر عارضی پابندی اور ٹریفک کا رخ موڑنے کا اعلان کیا ہے۔

ترجمان موٹروے پولیس کے مطابق موٹروے ایم-1 پر چارسدہ کے قریب کلومیٹر 504 پر شدید بارش کے باعث مسافر بردار گاڑیوں کا داخلہ عارضی طور پر بند کر دیا گیا ہے،پولیس حکام نے مسافروں سے اپیل کی ہے کہ وہ سفر سے قبل موسم اور ٹریفک کی صورتحال سے آگاہی حاصل کریں اور احتیاط سے ڈرائیونگ کریں۔

دوسری جانب ای-35 ہزارہ موٹروے پر ہائی وولٹیج بجلی کی لائن کی مرمت کے باعث مختلف مقامات پر ٹریفک کا رخ تبدیل کر دیا گیا ہے۔

مزیدپڑھیں:کاغان میں سیاحوں کی گاڑی کھائی میں گرنے سے 2 نوجوان جاں بحق ،3زخمی

موٹروے پولیس کے مطابق 96 کلومیٹر جنوبی سمت (مین)، 95 کلومیٹر جنوبی سمت بیدڑہ اور 84 کلومیٹر شمالی سمت قلندرآباد کے قریب ٹریفک کو متبادل راستوں پر منتقل کیا جا رہا ہے تاکہ مرمتی کام محفوظ انداز میں مکمل کیا جا سکے۔

موٹروے پولیس نے شہریوں کو ہدایت کی ہے کہ وہ غیر ضروری سفر سے گریز کریں، جاری کردہ ٹریفک ایڈوائزری پر عمل کریں اور کسی بھی پریشانی سے بچنے کے لیے متبادل راستوں کا انتخاب کریں۔