جمعرات 24 ستمبر 2026 
اسلام آباد:وفاقی حکومت نے عوام کو ریلیف فراہم کرتے ہوئے پیٹرولیم مصنوعات کی قیمتوں میں کمی کا باقاعدہ اعلان کر دیا ہے۔ اوگرا ذرائع کے مطابق پیٹرولیم ڈویژن نے 25 ستمبر کے لیے نئی قیمتوں کا نوٹیفکیشن جاری کر دیا ہے، جس کے بعد ملک بھر میں نئی قیمتیں فوری طور پر نافذ العمل ہو گئی ہیں۔
جاری کردہ نوٹیفکیشن کے مطابق بین الاقوامی مارکیٹ میں تیل کی قیمتوں کے رحجان اور مقامی سطح پر معاشی اشاریوں کو مدنظر رکھتے ہوئے پیٹرول کی فی لیٹر قیمت میں 84 پیسے کمی کی گئی ہے، جبکہ ہائی اسپیڈ ڈیزل کو فی لیٹر 2 روپے 63 پیسے سستا کیا گیا ہے۔
قیمتوں میں اس ردو بدل کے بعد پیٹرول کی نئی قیمت 389 روپے 28 پیسے فی لیٹر ہو گئی ہے، جبکہ ڈیزل کی نئی قیمت کم ہو کر 412 روپے 12 پیسے فی لیٹر پر آ گئی ہے۔ عوامی حلقوں کی جانب سے اس معمولی کمی کو مہنگائی کے تناسب سے ناکافی قرار دیا جا رہا ہے، تاہم حکومت کا مؤقف ہے کہ اس اقدام سے ٹرانسپورٹ اور روزمرہ استعمال کی اشیا کی قیمتوں پر براہ راست مثبت اثرات مرتب ہوں گے۔
مزید پڑھیں :شہباز شریف کی ایرانی صدر سے ملاقات، علاقائی صورتحال پر تبادلہ خیال
دوسری جانب اقتصادی ماہرین کا کہنا ہے کہ حکومت کو پٹرولیم لیوی اور ٹیکسز میں مزید ریلیف دے کر عوام کو حقیقی معنوں میں ریلیف فراہم کرنا چاہیے تاکہ عام آدمی پر پڑنے والا مہنگائی کا بوجھ کم کیا جا سکے۔ نئی قیمتوں کا اطلاق آج رات بارہ بجے کے بعد سے کر دیا گیا ہے جس کے بعد تمام پٹرول پمپس پر نئے نرخ آویزاں کر دیے گئے ہیں۔
