یمن کے شہر عدن میں صدارتی محل پر حوثیوں کا میزائل حملہ، وزیراعظم محفوظ رہے

عدن: یمن کے جنوبی شہر عدن میں واقع صدارتی محل (معاشیق کمپلیکس) پر حوثی باغیوں کی جانب سے کیے جانے والے میزائل حملوں کے نتیجے میں دو سکیورٹی اہلکار جاں بحق ہو گئے ہیں، تاہم حملے کے وقت عمارت میں موجود یمنی وزیراعظم اور کابینہ کے اراکین محفوظ رہے۔

تفصیلات کے مطابق یمنی حکام نے تصدیق کی ہے کہ حوثی باغیوں نے جمعرات کے روز صدارتی کمپلیکس پر شدت کے ساتھ مجموعی طور پر پانچ میزائل داغے۔ یمنی وزیرِ اطلاعات معمر الاریانی نے واقعے کی شدید مذمت کرتے ہوئے بتایا کہ میزائل حملے کے باوجود وزیراعظم اور کابینہ کے دیگر وزراء بالکل محفوظ رہے، تاہم اس دوران سکیورٹی پر مامور دو اہلکار اپنی جان کی بازی ہار گئے۔

دوسری جانب، حوثی فوج کے عسکری ترجمان یحییٰ سریع نے اس حملے کی ذمہ داری قبول کرتے ہوئے دعویٰ کیا ہے کہ ان کی فورسز نے معاشیق کمپلیکس کے اندر قائم سعودی عسکری افسران کے زیرِ انتظام چلنے والے ملٹری آپریشنز ہیڈکوارٹرز اور اسلحے کے ایک بڑے ڈپو کو ہدف بنایا تھا۔ تجزیہ کاروں کے مطابق مدینہ کے قریب میزائل گرانے کے بعد حوثیوں کا یہ حملہ خطے میں جاری کشیدگی میں ایک نئے اور خطرناک اضافے کی غمازی کرتا ہے۔