بابر اعظم پسندیدہ پاکستانی کرکٹر ہیں: جیمز اینڈرسن

انگلینڈ کے سابق فاسٹ بولر جیمز اینڈرسن(Jimmy Anderson ) نے پاکستان کے اسٹار بلے باز بابر اعظم کو اپنا پسندیدہ پاکستانی کرکٹر قرار دے دیا۔

جیمز اینڈرسن نے یہ بات کرکٹ سے متعلق حالیہ ویڈیو میں کیا ہے، جس میں انہوں نے مختلف ممالک کے اپنے پسندیدہ کرکٹرز کے نام بتائے ہیں۔

اینڈرسن نے آسٹریلیا سے شین وارن، انگلینڈ سے جو روٹ، بھارت سے ویرات کوہلی، نیوزی لینڈ سے ٹم ساؤتھی، جنوبی افریقا سے اے بی ڈی ویلیئرز اور سری لنکا سے سنتھ جے سوریا کو منتخب کیا ہے۔

Jimmy Anderson names his favourite cricketer from each country 👀 pic.twitter.com/L9mavEd97T

— Cricket on TNT Sports (@cricketontnt) November 11, 2026

44 سالہ جیمز اینڈرسن انگلینڈ کی جانب سے ٹیسٹ کرکٹ میں سب سے زیادہ وکٹیں لینے والے بولر ہیں، انہوں نے مارچ 2024ء میں 700 ٹیسٹ وکٹیں مکمل کیں اور جولائی 2024ء میں ویسٹ انڈیز کے خلاف لارڈز میں اپنا 188واں اور آخری ٹیسٹ کھیلنے کے بعد انگلینڈ کی نمائندگی ختم کر دی تھی۔

وہ لنکاشائر کی جانب سے کھیلتے رہے اور 2026ء میں کاؤنٹی کی ریڈ بال ٹیم کی قیادت بھی کی، رواں سیزن میں انہوں نے 17.68 کی اوسط سے 50 وکٹیں حاصل کیں، تاہم لنکاشائر ڈویژن ٹو میں 8 ٹیموں میں ساتویں نمبر پر رہی۔

25 اکتوبر کو لنکاشائر نے تصدیق کی کہ وہ 2027ء کے لیے اینڈرسن کو نیا معاہدہ پیش نہیں کرے گی، جس کے بعد کاؤنٹی کے ساتھ ان کا 25 سالہ تعلق ختم ہو گیا، اینڈرسن نے اس علیحدگی کو اپنی خواہش کے برعکس اختتام قرار دیا، تاہم انہوں نے ریٹائرمنٹ کا اعلان نہیں کیا۔

دوسری جانب بابر اعظم ان دنوں خراب فارم سے گزر رہے ہیں، انہوں نے پاکستان کی حالیہ سہ ملکی سیریز کے 4 میچز میں 118 رنز بنائے جبکہ سری لنکا کے خلاف فائنل میں وہ صفر پر آؤٹ ہو گئے۔

مزیدپڑھیں:دہشت گردی کے خلاف جنگ آخری دہشت گرد کے خاتمے تک جاری رہے گی، وزیراعظم

بابر اعظم نے نومبر 2025ء میں سری لنکا کے خلاف اپنی 20 ویں ون ڈے سنچری اسکور کی تھی، جس کے بعد سے وہ انٹرنیشنل کرکٹ میں سنچری بنانے میں کامیاب نہیں ہو سکے۔

رواں سال ہونے والے ٹی ٹوئنٹی ورلڈ کپ میں بھی انہوں نے 5 اننگز میں 91 رنز بنائے۔

سابق پاکستانی بلے باز محمد یوسف نے بابر اعظم کو مشورہ دیا ہے کہ وہ اپنی تکنیکی خامیوں کو دور کرنے کے لیے انگلینڈ یا آسٹریلیا میں خصوصی کوچنگ حاصل کریں۔

بابر اعظم نے 6 نومبر کو قائدِاعظم ٹرافی میں لاہور وائٹس کی جانب سے 42 رنز بنائے تھے، تاہم آؤٹ ہونے کے بعد انہوں نے غصے میں اپنا بلا پچ پر مارا تھا۔

البتہ رواں سال بابر اعظم کی کارکردگی ہر موقع پر مایوس کن نہیں رہی، وہ پاکستان سپر لیگ 2026ء میں 588 رنز بنا کر ٹورنامنٹ کے سب سے زیادہ رنز بنانے والے بلے باز رہے۔