پیر 8 جون 2026 
وزیراعظم محمد شہباز شریف(Shehbaz Sharif) نے گلگت بلتستان میں شفاف، پرامن اور سیاسی سرگرمیوں سے بھرپور انتخابات کے انعقاد پر عوام کو مبارکباد دیتے ہوئے انتخابی عمل کو جمہوریت کی مضبوطی کی علامت قرار دیا ہے۔
وزیراعظم نے اپنے بیان میں کہا کہ گلگت بلتستان کے عوام نے انتخابات میں بھرپور شرکت کرکے جمہوری اقدار کے فروغ میں اہم کردار ادا کیا ہے۔ انہوں نے کہا کہ سیاسی عمل میں عوام کی فعال شمولیت قابلِ تحسین ہے اور یہی جمہوری نظام کا حسن ہے۔
شہباز شریف نے کہا کہ پاکستان پیپلز پارٹی گلگت بلتستان کے انتخابات میں اکثریتی سیاسی جماعت کے طور پر سامنے آئی ہے، جس پر وہ مبارکباد کی مستحق ہے۔ انہوں نے صدر آصف علی زرداری اور بلاول بھٹو زرداری کو بھی اس کامیابی پر مبارکباد پیش کی۔
وزیراعظم نے پاکستان مسلم لیگ (ن) کے کامیاب امیدواروں کو بھی مبارکباد دیتے ہوئے کہا کہ پارٹی امیدواروں اور کارکنوں نے بھرپور محنت اور عزم کے ساتھ انتخابی مہم چلائی۔ انہوں نے مسلم لیگ (ن) کی ٹیم کی کوششوں کو سراہتے ہوئے انہیں شاباش دی۔
مزیدپڑھیں:ملک بھر میں شدید گرمی، چند مقامات پر بارش کی پیشگوئی
انہوں نے گلگت بلتستان کے تمام کامیاب امیدواروں کو مبارکباد پیش کرتے ہوئے امید ظاہر کی کہ وہ عوامی خدمت اور خطے کی ترقی کے لیے اپنی ذمہ داریاں احسن انداز میں نبھائیں گے۔
وزیراعظم کا کہنا تھا کہ پرامن اور شفاف انتخابات جمہوریت کے استحکام کے لیے ناگزیر ہیں۔ انہوں نے الیکشن کمیشن کی جانب سے غیر جانبدار اور شفاف انتخابی عمل کے انعقاد کو سراہتے ہوئے اسے قابلِ ستائش قرار دیا۔
شہباز شریف نے پولیس اور دیگر قانون نافذ کرنے والے اداروں کی خدمات کو بھی خراجِ تحسین پیش کیا اور کہا کہ ان اداروں نے امن و امان برقرار رکھنے اور انتخابی عمل کو کامیاب بنانے میں مؤثر کردار ادا کیا، جس پر وہ مبارکباد کے مستحق ہیں۔
