اتوار 5 جولائی 2026 
ریاض: اوپیک پلس (Opac Plus Countries) کے رکن سعودی عرب سمیت سات تیل پیدا کرنے والے ممالک نے عالمی منڈی میں توازن اور استحکام برقرار رکھنے کے لیے تیل کی پیداوار میں یومیہ ایک لاکھ 88 ہزار بیرل ایڈجسٹمنٹ کا فیصلہ کر لیا ہے۔
اوپیک پلس کے جاری بیان کے مطابق اس فیصلے میں سعودی عرب کے علاوہ روس، عراق، کویت، قازقستان، الجزائر اور عمان بھی شامل ہیں۔
تنظیم کا کہنا ہے کہ پیداوار میں یہ ردوبدل عالمی منڈی کی موجودہ صورتحال، طلب و رسد کے توازن اور قیمتوں میں استحکام کو مدنظر رکھتے ہوئے کیا گیا ہے۔
بیان میں کہا گیا کہ رکن ممالک مارکیٹ کی صورتحال پر مسلسل نظر رکھے ہوئے ہیں اور ضرورت پڑنے پر پیداوار کی سطح میں مزید مناسب تبدیلیاں بھی کی جا سکتی ہیں تاکہ عالمی توانائی منڈی میں استحکام برقرار رہے۔
اوپیک پلس نے واضح کیا کہ تیل کی پیداوار سے متعلق یہ حکمت عملی باہمی مشاورت اور رضاکارانہ تعاون کے تحت اختیار کی گئی ہے، جس کا مقصد عالمی معیشت اور توانائی کی ضروریات کے درمیان توازن قائم رکھنا ہے۔
مزید پرھیں:5جولائی پاکستان کی جمہوری تاریخ کاسیاہ ترین باب ہے،بلاول بھٹو زرداری
تنظیم کے مطابق ان سات ممالک کا اگلا اجلاس 2 اگست 2026 کو منعقد ہوگا، جس میں عالمی تیل مارکیٹ کی تازہ صورتحال، طلب و رسد، قیمتوں کے رجحانات اور آئندہ کی حکمت عملی کا تفصیلی جائزہ لیا جائے گا، اجلاس میں ضرورت کے مطابق پیداوار سے متعلق مزید فیصلے بھی کیے جا سکتے ہیں۔
