اسپورٹس ڈپلومیسی، ایران کا پاکستان کیساتھ ہاکی کے فروغ کیلئے اظہارِ دلچسپی

پی ایچ ایف ترجمان کے مطابق ایران اپنی مرد اور خواتین کی قومی ہاکی ٹیمیں پاکستان بھیجنے کا خواہشمند ہے

پاکستان ہاکی فیڈریشن کی جانب سے اسپورٹس ڈپلومیسی کے تحت پاکستان اور اسلامی جمہوریہ ایران کے مابین کھیلوں کے شعبے میں تعاون کا ایک نیا باب رقم ہونے جا رہا ہے۔ ایران نے پاکستان کے ساتھ ہاکی کے فروغ اور دوطرفہ تعلقات کو مزید مضبوط بنانے کے لیے گہری دلچسپی کا اظہار کیا ہے۔

پی ایچ ایف ترجمان کے مطابق ایران اپنی مرد اور خواتین کی قومی ہاکی ٹیمیں پاکستان بھیجنے کا خواہشمند ہے، جو اسلام آباد میں پاکستان کی قومی ٹیموں کے ساتھ مشترکہ تربیتی سیشنز اور پریکٹس میچز کھیلیں گی۔

مزید پڑھیں:ECO اجلاس، دوسرے روز ایرانی وزیرخارجہ بھی شریک ہونگے

پاکستان ہاکی فیڈریشن کے حکام کا کہنا ہے کہ یہ اقدام نہ صرف دونوں برادر ملکوں کے درمیان کھیلوں کے تعلقات کو مزید مستحکم کرے گا بلکہ اسپورٹس ڈپلومیسی کی ایک بہترین مثال بھی ثابت ہوگا جس سے بین الاقوامی سطح پر پاکستان ہاکی کے مثبت تشخص کو مزید فروغ ملے گا۔