ہفتہ 1 اگست 2026 
برطانوی توانائی کمپنی شیل(Shell) نے سائپرس میں اپنی ذیلی کمپنی بی جی سائپرس کو ہنگری کی آئل اینڈ گیس کمپنی ایم او ایل گروپ کے ہاتھوں زیادہ سے زیادہ 720 ملین امریکی ڈالر میں فروخت کرنے کا معاہدہ کر لیا ہے۔
کمپنی کے مطابق یہ معاہدہ 2027 میں مکمل ہونے کی توقع ہے، جس کے بعد ایم او ایل گروپ کو سائپرس کے آف شور بلاک میں بی جی سائپرس کا 35 فیصد غیر آپریٹنگ حصہ منتقل ہو جائے گا۔ اس بلاک میں مشرقی بحیرہ روم کا معروف ایفروڈائٹ گیس فیلڈ واقع ہے۔
شیل کے انٹیگریٹڈ گیس کے صدر سیڈرک کریمرز نے کہا کہ یہ فیصلہ کمپنی کی سرمایہ کاری کو زیادہ مؤثر بنانے اور اپنے کاروباری پورٹ فولیو کو ایل این جی (مائع قدرتی گیس) پر مرکوز کرنے کی حکمت عملی کا حصہ ہے۔
شیل عالمی سطح پر ایل این جی کے بڑھتے ہوئے استعمال سے فائدہ اٹھانے کے لیے اپنے کاروبار کو وسعت دے رہی ہے۔ کمپنی نے حال ہی میں اعلان کیا تھا کہ کینیڈا میں اپنے ایل این جی منصوبے کے دوسرے مرحلے پر حتمی سرمایہ کاری کا فیصلہ 2026 کے اختتام تک کیا جائے گا۔
مزیدپڑھیں:اوگرا نے ایل پی جی کے بعد ایل این جی بھی مہنگی کردی
ایفروڈائٹ گیس فیلڈ میں شیورون کی ذیلی کمپنی 35 فیصد حصے کے ساتھ آپریٹر ہے، جبکہ بی جی سائپرس کے پاس 35 فیصد اور اسرائیل کی نیو میڈ انرجی کے پاس 30 فیصد غیر آپریٹنگ حصہ ہے۔
واضح رہے کہ شیل نے 2016 میں بی جی گروپ کو خریدنے کے بعد یہ اثاثہ اپنے کنٹرول میں لیا تھا۔ کمپنی نے حال ہی میں دوسری سہ ماہی کے دوران 9.84 ارب امریکی ڈالر کا خالص منافع بھی رپورٹ کیا، جو گزشتہ سال کے مقابلے میں نمایاں اضافہ ہے، جبکہ ایل این جی کاروبار کی بہتر کارکردگی نے اس میں اہم کردار ادا کیا۔
