جمعہ 21 اگست 2026 
اسلام آباد: جسٹس سید حسن اظہر رضوی نے وفاقی آئینی عدالتِ پاکستان کے قائم مقام چیف جسٹس کی حیثیت سے حلف اٹھا لیا۔
حلف برداری کی تقریب میں جسٹس عامر فاروق نے جسٹس سید حسن اظہر رضوی سے قائم مقام چیف جسٹس کے منصب کا حلف لیا۔
چیف جسٹس وفاقی آئینی عدالت جسٹس امین الدین خان کے بیرونِ ملک دورے کے باعث جسٹس سید حسن اظہر رضوی نے قائم مقام چیف جسٹس کی ذمہ داریاں سنبھالی ہیں۔
واضح رہے کہ جسٹس سید حسن اظہر رضوی 2 فروری 1962 کو کراچی میں پیدا ہوئے۔ انہوں نے بی ایس سی، ایل ایل بی اور ایل ایل ایم کی تعلیم حاصل کی، وہ 18 فروری 2010 کو سندھ ہائیکورٹ کے جج مقرر ہوئے اور تقریباً 12 سال سندھ ہائیکورٹ میں خدمات انجام دینے کے بعد 2022 میں سپریم کورٹ آف پاکستان کے جج بنے۔
جسٹس حسن اظہر رضوی کو 14 نومبر 2025 کو وفاقی آئینی عدالت پاکستان کا جج مقرر کیا گیا، وفاقی آئینی عدالت کی سرکاری ویب سائٹ کے مطابق وہ عدالت کے سینئر ترین جج ہیں اور اسی حیثیت سے جوڈیشل کمیشن آف پاکستان اور سپریم جوڈیشل کونسل کے رکن بھی ہیں۔
اپنے طویل عدالتی کیریئر کے دوران جسٹس حسن اظہر رضوی نے سندھ ہائیکورٹ اور سپریم کورٹ میں اہم آئینی، فوجداری اور دیگر نوعیت کے مقدمات کی سماعت کی۔ وفاقی آئینی عدالت میں بطور سینئر ترین جج ان کا کردار آئینی مقدمات کی سماعت اور عدالتی امور میں خاص اہمیت کا حامل ہے۔
مزید پڑھیں:کراچی ، NEOC کی 6 اضلاع کے ماحولیاتی نمونوں میں پولیو وائرس کی تصدیق
اب چیف جسٹس امین الدین خان کی غیر موجودگی میں جسٹس سید حسن اظہر رضوی نے قائم مقام چیف جسٹس کی ذمہ داریاں سنبھال لی ہیں۔ اس موقع پر حلف برداری کی تقریب وفاقی آئینی عدالت میں منعقد ہوئی، جس میں عدالتی منصب کے آئینی تسلسل کو برقرار رکھتے ہوئے انہیں قائم مقام سربراہ کی ذمہ داریاں سونپی گئیں۔
