اتوار 28 ستمبر 2025 
بھارت کی مشہور خاتون باکسراور چھ مرتبہ عالمی چیمپئن کا اعزاز حاصل کرنے والی میری کام کے گھر پر گزشتہ روز ڈکیتی ہوئی۔ اس دوران میری کام میگھالیہ میں ایک میراتھن ایونٹ میں حصہ لے رہی تھیں۔
بھارتی میڈیا رپورٹس میں کہا گیا ہے کہ پولیس حکام کے مطابق ان کا دو منزلہ بنگلہ کئی دنوں سے بند تھا۔ اس دوران نامعلوم افراد گھر میں داخل ہو کر کئی لاکھ روپے کے قیمتی سامان اور ٹی وی چرا کر لے گئے۔
واقعے کی رات کے سی سی ٹی وی فوٹیج میں مشتبہ افراد کو قیمتی اشیاء، بشمول ٹی وی، اٹھاتے ہوئے دیکھا گیا۔ فوٹیج کی جانچ اس وقت حکام کر رہے ہیں تاکہ ملزمان کی شناخت کی جا سکے۔
میری کام نے بتایا کہ انہیں پڑوسیوں نے اس ڈکیتی کے بارے میں اطلاع دی۔ انہوں نے کہا، ’میں خوفزدہ اور پریشان ہوں کیونکہ آج مجھے دہلی واپس آنا تھا۔ یہ واقعہ اس ہفتے کے آغاز میں ہوا۔ سی سی ٹی وی فوٹیج میں دکھایا گیا ہے کہ چور ٹی وی اور دیگر اشیاء لے گئے ہیں۔ پڑوسیوں نے بتایا کہ یہ واقعہ 24 ستمبر کو ہوا۔‘
انہوں نے کہا کہ میں نے پولیس کو اطلاع دے دی ہے۔ نقصان کی صحیح تفصیلات گھر پہنچنے کے بعد ہی معلوم ہوں گی۔
فرید آباد پولیس نے واقعے کے بعد چھ الگ ٹیمیں تشکیل دی ہیں تاکہ ملزمان کو گرفتار کیا جا سکے۔ پولیس نے تصدیق کی ہے کہ مقدمہ درج کر کے تحقیقات شروع کر دی گئی ہیں۔
میری کام باکسنگ کی تاریخ میں پہلی خاتون باکسر ہیں جنہوں نے چھ عالمی ٹائٹلز جیتے ہیں۔ وہ پانچ مرتبہ ایشین چیمپیئن رہ چکی ہیں اور بھارت کی پہلی خاتون باکسر ہیں جنہوں نے 2014 کے ایشین گیمز میں سونے کا تمغہ جیتا۔
