ہفتہ 6 جون 2026 
شمالی کوریا (North Korea)کے رہنما کم جونگ اُن نے بحریہ کو ہدایت دی ہے کہ وہ 10,000 ٹن وزن تک کے جدید ڈسٹرائر جنگی جہاز تیار کرے۔ سرکاری میڈیا کے مطابق یہ فیصلہ ایسے وقت میں سامنے آیا ہے جب کم جونگ اُن آئندہ ہفتے چین کے صدر شی جن پنگ کے دورے سے پہلے فوجی سرگرمیوں اور تنصیبات کا معائنہ کر رہے ہیں۔
رپورٹ کے مطابق کم نے جمعرات کے روز بحریہ کی مشقوں اور نئے تیار ہونے والے جنگی جہازوں کا معائنہ کیا۔ ان میں 5,000 ٹن کا ڈسٹرائر “کانگ کون” اور ایک اور 5,000 ٹن جنگی جہاز “چوے ہون” شامل تھے۔ انہی دوروں کے دوران انہوں نے اس بات پر زور دیا کہ ملک کو اپنی بحری طاقت مزید مضبوط کرنی چاہیے تاکہ جوہری حملے کے خطرے کو روکا جا سکے اور زمین، سمندر اور فضا تینوں میدانوں میں دفاعی صلاحیتیں بڑھائی جا سکیں۔
مزید پڑھیں؛کم جونگ اُن کی جوہری وراثت 13 سالہ بیٹی کے حوالے، بااثر بہن کا جھکنے سے انکار
یہ بھی بتایا گیا ہے کہ کم نے ایک نئی جوہری مواد کی تیاری کی تنصیب کا دورہ کرتے ہوئے ملک کے جوہری ہتھیاروں میں مزید تیزی سے توسیع کی ضرورت پر زور دیا۔ مبصرین کے مطابق 10,000 ٹن ڈسٹرائر بنانے کا اعلان پہلی بار کیا گیا ہے اور اسے خطے میں طاقت کے اظہار اور آنے والے چینی صدر کے دورے سے قبل ایک اسٹریٹجک پیغام کے طور پر دیکھا جا رہا ہے۔
