پیر 6 جولائی 2026 
پاکستان کرکٹ بورڈ (PCB) نے کھلاڑیوں کی تربیت میں مزید جدت لانے کے لیے نیشنل کرکٹ اکیڈمی میں جدید ’ٹرو مین 3‘ بولنگ مشین نصب کردی ہے۔
پاکستان کرکٹ بورڈ (پی سی بی) کے مطابق اس نئی ٹیکنالوجی کا مقصد بیٹرز کو حقیقی میچ جیسی صورتحال میں پریکٹس کے بہتر مواقع فراہم کرنا ہے تاکہ وہ اپنی تکنیکی صلاحیتوں میں مزید نکھار لا سکیں۔
اس مشین کی خاص بات یہ ہے کہ اس کی فرنٹ اسکرین پر بولر کی ہائی کنٹراسٹ ایل ای ڈی اینیمیشن دکھائی دیتی ہے جس سے بیٹرز کو بولر کے ایکشن، ریلیز پوائنٹ اور ٹائمنگ کا درست اندازہ لگانے میں مدد ملتی ہے۔
مزیدپڑھیں:ملک میں تعلیمی بحران؛ ڈھائی کروڑ بچے اسکول جانے سے قاصر
اس کے علاوہ رفتار، لائن، لینتھ، سوئنگ اور گیند کی اونچائی کو بھی ضرورت کے مطابق تبدیل کیا جا سکتا ہے جبکہ کوچز مختلف گیندوں، اوورز اور اسپیلز کو محفوظ کرکے بعد میں میچ جیسی صورتحال پیدا کرنے کے لیے استعمال کر سکتے ہیں۔
State-of-the-art bowling machine installed at National Cricket Academy
Details here ⤵️ https://t.co/1UpwgteGGJ
— PCB Media (@TheRealPCBMedia) July 6, 2026
ڈائریکٹر ہائی پرفارمنس عاقب جاوید کے مطابق پاکستان کرکٹ بورڈ اس جدید مشین کو استعمال کرنے والا دنیا کا پہلا کرکٹ بورڈ بن گیا ہے۔
ان کا کہنا تھا کہ روایتی بولنگ مشینوں کے مقابلے میں یہ نظام بیٹرز کو بولر کی ویڈیو کے ساتھ زیادہ حقیقت کے قریب پریکٹس کا موقع دیتا ہے۔
قومی ٹیم کے کپتان سلمان علی آغا نے بھی اس ٹیکنالوجی کو جدید کرکٹ کی ضروریات کے مطابق اہم پیش رفت قرار دیتے ہوئے کہا کہ اس سے کھلاڑیوں کی ٹائمنگ اور بیٹنگ میں نمایاں بہتری آئے گی۔
