حوثیوں کی پیش قدمی: سعودی عرب نے اتحادی افواج کے کمانڈر کو ہٹا دیا

Calender Icon پیر 16 نومبر 2026

یمن میں حوثی باغیوں کی مسلسل پیش قدمی کے دوران سعودی عرب نے ایک اہم عسکری تبدیلی کرتے ہوئے مشترکہ اتحادی افواج کے کمانڈر لیفٹیننٹ جنرل فہد بن حمد السلمان کو عہدے سے ہٹا کر جنرل فیاض بن حامد الرویلی کو نیا کمانڈر مقرر کر دیا ہے۔

خبر رساں ادارے کے مطابق سعودی سرکاری ذرائع نے تصدیق کی ہے کہ اتحادی افواج کی قیادت میں تبدیلی کا یہ شاہی فرمان خادمِ حرمین شریفین شاہ سلمان بن عبدالعزیز کی جانب سے جاری کیا گیا ہے۔ شاہی فرمان کے تحت جنرل فیاض بن حامد الرویلی اپنی موجودہ ذمہ داریوں کے ساتھ ساتھ مشترکہ اتحادی افواج کی کمان بھی سنبھالیں گے، جبکہ سبکدوش ہونے والے کمانڈر لیفٹیننٹ جنرل فہد بن حمد السلمان کو وزیرِ دفاع کا عسکری امور سے متعلق مشیر مقرر کیا گیا ہے جہاں وہ اپنی نئی ذمہ داریاں انجام دیں گے۔

خبر رساں ادارے کے مطابق یمن میں ایران کے حمایت یافتہ حوثی باغیوں نے مختلف محاذوں پر تیزی سے پیش قدمی کی ہے، جس کے باعث سعودی حمایت یافتہ یمنی حکومتی فورسز کو باب المندب کے اسٹریٹجک علاقے سے پیچھے ہٹ کر جنوبی بندرگاہی شہر عدن کی جانب اپنی دفاعی پوزیشن مضبوط کرنا پڑی ہے۔ عسکری مبصرین کا کہنا ہے کہ حکومتی فورسز کی اس پسپائی سے حوثیوں کی عدن کی جانب پیش قدمی کا خطرہ مزید بڑھ گیا ہے اور قیادت میں یہ اچانک تبدیلی حوثیوں کے خلاف گزشتہ چھ ہفتوں سے جاری فوجی کارروائی کے لیے ایک بڑا دھچکا قرار دی جا رہی ہے۔