جمعہ 13 نومبر 2026 
پاکستان تحریک انصاف (PTI)اور حکومتی و سرکاری حلقوں کے درمیان پسِ پردہ رابطوں میں مبینہ تیزی کے بعد سیاسی منظرنامے میں اہم تبدیلی کے امکانات ظاہر کیے جا رہے ہیں۔
عمران خان کے اہل خانہ کی پہلی مرتبہ ان رابطوں میں براہ راست شمولیت، پی ٹی آئی قیادت کی ایک اہم عدالتی شخصیت سے ملاقات اور بانی پی ٹی آئی تک رسائی کے لیے عدالتی احکامات کو ممکنہ پیشرفت کے اشارے قرار دیا جا رہا ہے۔
ذرائع کا دعویٰ ہے کہ آنے والے چند روز میں عمران خان اور پی ٹی آئی کو درپیش بعض مشکلات میں کمی آ سکتی ہے۔
ذرائع کے مطابق 9 نومبر کو بیرسٹر گوہر علی خان، سینیٹر علی ظفر اور سلمان صفدر نے ایک اہم عدالتی شخصیت سے ملاقات کی تھی جس میں بانی چیئرمین پی ٹی آئی عمران خان کی صحت، انہیں طبی سہولیات کی فراہمی اور ان تک اہل خانہ و وکلا کی رسائی سے متعلق امور زیر بحث آئے۔
ذرائع کا کہنا ہے کہ اس ملاقات کے بعد ہونے والی پیشرفت کے نتیجے میں 2 وکلا کو عمران خان سے ملاقات کی اجازت دینے کے احکامات جاری ہوئے، جس کے بعد لطیف کھوسہ اور سلمان صفدر کی عمران خان اور بشریٰ بی بی سے اڈیالہ جیل میں طویل ملاقات کرائی گئی۔
ذرائع کے مطابق عمران خان کو پمز اسپتال منتقل کیے جانے کے معاملے سے بیرسٹر گوہر علی خان بھی باخبر تھے اور ان کی طبی دیکھ بھال کے حوالے سے متعلقہ حلقوں میں رابطے جاری تھے۔ آنے والے دنوں میں عمران خان کو کسی نجی اسپتال منتقل کیے جانے کا امکان بھی ظاہر کیا جا رہا ہے جبکہ اس مقصد کے لیے ایک نجی اسپتال کی انتظامیہ کو بھی آگاہ کر دیا گیا ہے۔ تاہم اسپتال میں قیام کی مدت کے بارے میں فی الحال کوئی حتمی فیصلہ سامنے نہیں آیا۔
عمران خان کے اہل خانہ بھی پسِ پردہ رابطوں میں شامل
سینیئر صحافی انصار عباسی کے مطابق پی ٹی آئی اور حکام کے درمیان جاری پس پردہ رابطوں میں پہلی مرتبہ عمران خان کے اہل خانہ بھی براہ راست شامل ہوگئے ہیں جسے سیاسی کشیدگی میں کمی اور ممکنہ مفاہمت کی جانب اہم پیشرفت قرار دیا جا رہا ہے۔
ان رابطوں کا مقصد عمران خان، ان کے خاندان اور پاکستان تحریک انصاف کو درپیش مسائل کو مسلسل محاذ آرائی کے بجائے بات چیت اور باہمی رابطوں کے ذریعے حل کرنے کی کوشش کرنا بتایا جاتا ہے۔
ذرائع کا کہنا ہے کہ ان رابطوں کے نتیجے میں بعض معاملات پر پیشرفت بھی ہوئی ہے جن میں عمران خان کے اہل خانہ اور ان کی بہنوں کی ملاقات کا انتظام بھی شامل ہے۔ امکان ظاہر کیا جا رہا ہے کہ آنے والے چند روز میں عمران خان کی 2 بہنوں کی رہائی سے متعلق بھی کوئی پیشرفت سامنے آ سکتی ہے تاہم اس حوالے سے تاحال کوئی باضابطہ اعلان نہیں کیا گیا۔
بشریٰ بی بی کی صحت اور اسپتال منتقلی سے متعلق پیشرفت متوقع
ذرائع کے مطابق بشریٰ بی بی کی صحت کے معاملے پر بھی اہم پیشرفت متوقع ہے اور آئندہ چند روز میں انہیں اسپتال منتقل کیے جانے کا امکان ظاہر کیا جا رہا ہے۔
بتایا جاتا ہے کہ پروفیسر ڈاکٹر ندیم قریشی کی بیرون ملک سے واپسی کے بعد بشریٰ بی بی کا مکمل طبی معائنہ کیا جائے گا جس کے بعد ان کی صحت اور علاج سے متعلق آئندہ کا لائحہ عمل طے کیا جا سکتا ہے۔
بیرسٹر گوہر رابطوں میں اہم کردار ادا کر رہے ہیں؟
سینیئر صحافی انصار عباسی کی رپورٹ کے مطابق ان مبینہ رابطوں میں پی ٹی آئی کی جانب سے اہم رابطہ کاروں کے علاوہ بعض حکومتی اور سرکاری حلقے بھی شامل ہیں تاہم ان رابطوں میں شریک افراد فی الحال اپنی شناخت اور کردار کو منظرِ عام پر لانے سے گریز کر رہے ہیں۔
رپورٹ میں بیرسٹر گوہر علی خان کو ان رابطوں میں اہم کردار ادا کرنے والا رہنما قرار دیا گیا ہے۔ تاہم اس حوالے سے مؤقف جاننے کے لیے رابطہ کرنے پر انہوں نے مبینہ پسِ پردہ رابطوں کے بارے میں تبصرہ کرنے سے گریز کیا۔
دوسری جانب عمران خان کے بہنوئی احد خان کو بھی ذرائع ابلاغ کے نمائندوں سے گفتگو کے دوران پس پردہ رابطوں کا اعتراف کرتے ہوئے سنا گیا ہے۔
کیا آنے والے چند روز میں بڑی سیاسی پیشرفت متوقع ہے؟
سیاسی حلقوں میں ان تمام واقعات کو ایک دوسرے سے جڑی ممکنہ پیشرفت کے طور پر دیکھا جا رہا ہے۔ ایک جانب عمران خان کی صحت، علاج اور ملاقاتوں کے معاملات میں پیشرفت سامنے آ رہی ہے تو دوسری جانب ان کے اہل خانہ کی پس پردہ رابطوں میں شمولیت نے سیاسی مفاہمت کی امیدوں کو بھی تقویت دی ہے۔
ذرائع کا دعویٰ ہے کہ ان رابطوں کو آنے والے چند روز میں عملی اقدامات میں تبدیل کرنے کی کوشش کی جا رہی ہے جس کے نتیجے میں پی ٹی آئی اور حکام کے درمیان وسیع تر مفاہمت کی راہ بھی ہموار ہو سکتی ہے۔ تاہم ان رابطوں کے نتیجے میں کسی بڑے سیاسی فیصلے یا پالیسی تبدیلی کا امکان فی الحال قیاس آرائیوں تک محدود ہے اور صورتِ حال کی واضح تصویر آنے والے دنوں میں سامنے آ سکتی ہے۔
